“Harry El Suciu” triplica los espectadores del doblaxe en castellanu

“Harry El Suciu”, el tercer llargometraxe dobláu al asturianu pa TPA, tuvo esti vienres 2 de xineru una audiencia del 3,7% y 13.000 espectadores lo que, anque con datos más discretos, vien sumase a los bonos resultaos algamaos poles dos pelicules anteriores n’asturianu. Esta película norteamericana, dirixida en 1971 por Don Siegel y protagonizada por Clint Eastwood, llegó a triplicar los datos del cine en castellanu emitíu nel mesmu horariu nestes feches navidiegues. Amás, “Harry El Suciu” xeneró cientos de comentarios al traviés de twitter, dalgo ensin precedentes na TPA y que mostró una audiencia más moza que’l restu d’espacios de la cadena.

No que se refier a les audiencies del cine en castellanu, el vienres 26 foi una película asturiana en castellanu la que s’emitió en prime-time: “Todo el tiempo del mundo”, dirixida por José Antonio Quirós y estrenada nel FICXixón pasáu, que quedó col 1,3% y 5.000 espectadores mientres que’l sábadu 20, “Country Strong”, película del 2011 protagonizada por Gwyneth Paltrow, tuvo un 2,8% y 1.000 espectadores -12.000 menos que “Harry El Suciu”-. Si atendemos a estes cifres podemos interpretar qu’existe una mayor demanda per parte de l’audiencia de TPA de doblaxes al asturianu que de ficción asturiana rodada en castellanu o de doblaxes a esta llingua.

Mentanto, ye de reseñar l’audiencia mínima de les series norteamericanes doblaes al castellanu –con doblaxes fechos en Madrid polos que TPA tien que pagar a la FORTA-. Asina, los dos capítulos de “Fringe” emitíos el 20 d’avientu quedaron nel 0,1% y 0,2% -menos de 1.000 espectadores-, mentes que la estrena de la cuarta temporada de “Damages”, serie d’éxitu en tol mundu protagonizada por Glenn Close, quedó tamién en 0,2% y 1.000 espectadores. Too ello a pesar de que s’emitió depués de la versión n’asturianu de “Harry El Suciu”, polo qu’ente la película de Clint Eastwood y la serie de Glenn Close hubo una pérdiga de 12.000 espectadores.

A l’audiencia de la cinta dirixida por Don Siegel hai que sumar l’éxitu de la reposición de dalgunos capítulos de “Los Bolechas”, que se tan repitiendo coincidiendo cola Navidá. Asina, el primer capítulu emitíu esti sábado 3 de xineru llegó a axuntar a 19.000 espectadores algamando un 7,1% de share. Too ello a pesar de competir colos informativos de les televisiones estatales. En xeneral, pue vese que’l doblaxe asturianu ta permitiendo la entrada de públicos nuevos na TPA, porque mentes el perfil d’audiencia ye una muyer mayor de 65 años, ama de casa y residente en llugares de menos de 50.000 habitantes, espacios como “Los Bolechas” permiten reforciar los espectadores d’ente 4 y 12 años.

Per otru llau, col hastag #HarryElSuciu cientos d’asturianu mostraron al traviés de twitter les sos opiniones sobre’l doblaxe de la película. Toa una novedá na televisión pública, qu’hasta’l momentu y por mor del so perfil d’audiencia vivía de llau de l’audiencia social de twitter, que permite analizar les opiniones y emociones que xenéra'l conteníu televisivu.