“El tercer home”, segundu llargumetraxe dobláu al asturianu

Yá entamó’l trabayu pa doblar el segundu llargumetraxe n’asturianu. Como yá avanzara’l responsable de Gonzali Producciones, Illán Gonzali, nuna entrevista a ASTURIES.COM, “El tercer home” ye’l film escoyíu.

“El tercer home” ta dirixida por Carol Reed, escrita por Graham Greene y protagonizada por Joseph Cotten y Orson Welles. Nel so día recibió l’Óscar a la meyor fotografía en blanco y negro y munchos la consideren la meyor película británica de la historia.

Esti doblaxe, a diferencia de “La nueche de los muertos vivientes” va cuntar con actores profesionales. Una de les razones ye que, como dixo Illán Gonzali nel so día a ASTURIES.COM, “ye una película mui seria, con una voz determinada y unes característiques diferentes”.

Cinco doblaxes en total
El llabor de doblaxe de “El tercer hombre” yá entamó y habrá qu’esperar un tiempu pa ver los resultaos. Tamién hai que señalar qu’esta nun va ser la última película doblada n’asturianu, yá que Gonzali Producciones señaló que la so idea ye doblar, pel momentu, un total de cinco películes.