“El Gobiernu rebaxa a la nada les polítiques medioambientales”, alerta la Coordinadora Ecoloxista d'Asturies

Tres conocer la estructura del Gobiernu’l sábadu pasáu al traviés del BOPA, la Coordinadora Ecoloxista d’Asturies amuesa la so indignación pola dispersión de les competencies en materia medioambiental. Alerta d’una situación “caótica”.
 
“La estructura nueva del Gobiernu asturianu rebaxa a la nada les polítiques medioambientales. Nun sólo desapaez la escasa viceconseyería de Mediu Ambiente; pa más desastre distribuyéronse competencies antigües en delles conseyeríes, lo que dificulta les poques ganes que tienen d’actuar en temes ambientales”, apunten los ecoloxistes, qu’auguren qu’esta situación va provocar que “unes conseyeríes responsabilicen a otres y qu’al final nun se faiga nada”. Según esplica la Coordinadora, rebáxase “la yá escasa” viceconseyería de Mediu Ambiente al pasar les sos funciones a la Direición Xeneral de Mediu Ambiente que va depender de la Conseyería de Fomentu, Ordenación del Territoriu y Mediu Ambiente; y pola Direición Xeneral de Recursos Naturales, que va facelo de la viceconseyería de Recursos Autóctonos. Mentes, la que yera la Direición de Montes pasa a ser un servicio forestal tamién dependiente de Recursos Autóctonos. D’igual forma, mantiénse’l Conseyu Autonómicu de Mediu Ambiente “que’l PSOE llevaba 6 años ensin convocar”, porque “nun supón estructura dalguna”.
 
Esti organigrama nuevu no que se refier al mediu ambiente ye pa la Coordinadora dalgo fecho “con despropósitu” al entender que “dispersa les competencies, lo que xenera conflictos alministrativos y paralización nel desendolcu de los temes”. “Si enantes el mediu ambiente yera poco nel Principáu con una viceconseyería, agora pasa a la nada, quedándose en dos direiciones ensin vinculación orgánica que pue convertir en mas caótica la situación d’abandonu ambiental que yá padecemos”, aseguren los ecoloxistes
 
Na semeya, María Isabel Marqués, conseyera de Fomentu, Ordenación del Territoriu y Mediu Ambiente.