“El 25 de mayu ye una fecha claramente reivindicable por tol abanicu políticu”, apunta Zapico

L’historiador Faustino Zapico protagonizó’l miércoles nel Espaciu Cultural La Manzorga una charra de nome ’25 de mayu. Fechos y significáu’. Nella repasó tolo acontecío al rodiu d’esa fecha y la so importancia nel so tiempu.

 

“Trátase del niciu de la historia contemporánea d’Asturies”, principió Zapico la so intervención sobre’l 25 de mayu del 1808, xornada na que la Xunta Xeneral d’Asturies proclamó la so soberanía y declaraba-y la guerra al exércitu francés de Napoleón, “que nesi momentu dominaba Europa, dende Moscú a Lisboa”. Asturies, naquella dómina, yera un territoriu con un núcleu ilustráu mui potente, pero al mesmu tiempu mui retrasáu, con una estructura económica y social perarcaica. “Había munchos nobles, pero yeren probes de solemnidá”, esplicó’l mierense, que recordó que naque’l tiempu Asturies “yera un principáu venceyáu a la Corona castellana al traviés de la Xunta Xeneral”, que venía a funcionar como un parllamentu ensin poder llexislativu. Namái tenía soberanía financiera, esto ye, la capacidá d’imponer impuestos, y la facultá de determinar quien diba a la guerra.

 

Naquel tiempu, Asturies taba dividida en 48 conceyos que teníen representación na Xunta Xeneral, un órganu oligárquicu nel que, na toma de decisiones, dalgunos teníen un votu y otru mediu votu. Ésti aconceyaba cada trés años, polo que la coincidencia de la so convocatoria coles revueltes populares contra los franceses ye definida por Zapico “como una feliz casualidá histórica”. Éstes principiaron en Madrid el 2 de mayu y tuvieron como respuesta una represión brutal por parte del mariscal Murat, con una gran cantidá de muertos asturianos, dada la gran cantidá d’emigrantes qu’había na ciudá castellana. Inclusive, dalgún historiador apunta que’l 13 por cientu de los finaos na rebelión popular teníen los dos apellíos asturianos.

 

Les noticies llegaron a Uviéu’l 9 de mayu por dos víes: les órdenes daes por Murat, per un llau, y los familiares de los finaos. Darréu, la rebelión popular entama n’Asturies, con una influencia importante de dos muyeres, Marica Andayón y Xuaca Bobela. Nesa mesma xornada, la Xunta Xeneral decide nun aceptar nenguna autoridá que nun emane de Fernando VII  y principia a organizar un exércitu, que yera una de les sos funciones, en gran parte pola presión del pueblu y los gremios. Sicasí, el 13 de mayu retráctase de lo alcordao por mieu y unvía disculpes a Murat. Nesti momentu de la historia garra una relevancia especial Álvaro Flórez Estrada, procurador d’Asturies, “un personaxe históricu que debería ser recordáu pola so importancia, al igual que lo ye, salvando les distancies, Bolívar n’América”. Él y otros diputaos entamen una conspiración que nun tien marcha atrás el 23 de mayu, cuando Murat condena a muerte a toles persones que votaren na Xunta Xeneral contra los franceses y a favor de Fernando VII. La sublevación de los diputaos pasa agora, tamién, a ser “una custión de supervivencia”.

 

La Xunta Suprema

 

La madrugada del 24 al 25, los fechos asocédense y los trabayadores de la fábrica d’armes d’Uviéu rebélense y entamen a repartiles ente la población. La ciudá ye arrodiada por más de 2.000 homes armaos procedente de la redolada. Flórez Estrada, acompañáu por otres persones, visita al representante de la Real Audiencia –una especie de Delegación del Gobiernu– y reclama la convocatoria de la Xunta Suprema, na que participaríen 15 diputaos. Ésta declararía la guerra a los franceses, mostraría’l so apoyu a Fernando VII y unviaría un embaxador a Londres pa solicitar una allianza militar. Díes depués, convocaríase a la totalidá de la Xunta Xeneral pa ratificar la Xunta Suprema.

 

Tres la declaración de soberanía de la Xunta Xeneral, organizóse l’exércitu asturianu y creóse la bandera d’Asturies, xerme de l’actual, a partir d’un diseñu de Xovellanos. Inglaterra recibió con sorpresa a José María Queipo de Llano, pero vio con bonos güeyos qu’una institución del vieyu réxime declarara la guerra a Napoléon, el so enemigu principal. Asina, Inglatera unvió armes, perres y uniformes a Asturies pa lluchar contra los invasores franceses.

 

El Marqués de la Romana, al traviés d’un golpe militar, disolvió un añu depués la Xunta Suprema d’Asturies al entender que s’escedía nes sos atribuciones. Flórez Estrada, acompañáu d’otros homes, viaxa entós a Sevilla, sede de la Xunta Central, amazcaritáu de pastor al traviés de Portugal. Xovellanos apunta qu’ésta nun tien autoridá pa la disolución de la Xunta Xeneral d’Asturies, al ser anterior, y algamen la so restitución, “anque coles ales cortaes”. Nos años siguientes, l’órganu asturianu diba y venía, llegando finalmente a ser “un pantama de lo que fora anteriormente”. El so desaniciu llegaría cola llegada de la rexencia de María Cristina nel 1833 y la división territorial fecha por Javier de Burgos.

 

Repercusión importante nel XIX

 

Los fechos acontecíos alredor del mayu asturianu tuvieron “bastante repercusión a lo llargo del sieglu XIX”, espresó Zapico. Asina, Marx fala de la Xunta Xeneral d’Asturies nuna serie d’artículos pa la prensa americana y los sos acontecimientos son garraos pola historiografía nacionalista española pa so, creando’l tópicu p’Asturies de ‘fiera dormida’ qu’espierta nel momentu nel que ‘España’ la necesita, idea que “opera tamién na izquierda” nel sieglu XX.

 

Tres la segunda restauración borbónica y el procesu de formación de les autonomíes, el 25 de mayu torna al escaparate como posible Día d’Asturies, anque la izquierda apuesta pol 8 de setiembre, Día de la Santina, fecha que nun tien fundamentu más allá de lo relixoso, yá que nun tenemos constancia nin del día nin del añu de la batalla de Cuadonga. “El 25 de mayu ye una fecha claramente reivindicable por tol abanicu políticu”, afirmó Zapico nesti puntu, al entender qu’axunta modernidá y tradición.

 

La fecha de celebración del Día de la Nación Asturiana ocupó gran parte del alderique posterior, nel que l’historiador mierense destacó que’l 25 de mayu “hai una ruptura, pero se quier continuidá”, añadiendo que, depués de los fechos, “les coses yá nun pudieron ser como enantes”. Nesti puntu, tamién refugó la idea de comparar los procesos d’independencia de les colonies d’América Llatina col casu asturianu, que foi “un procesu d’autodeterminación centrípeta”, yá que lo que demandaba’l pueblu asturianu nesi momentu, “enquivocaos o non”, yera la restitución de Fernando VII.

 

Na semeya, Zapico y Boni Ortiz.