“Dende Conceyu Abiertu entendemos que lo importante ye dar pasos de forma xunitaria”, afirma Arbesú

Conceyu Abiertu refugó nel so Conceyu Nacional dir en solitariu a les Europees del 25 de mayu. El so coordinador nacional, Mariu Arbesú, señala que la plataforma d’eleutores entiende que "lo importante ye dar pasos de forma xunitaria”.

El muérganu principal de decisión de la organización, el segundu que se celebra dende la so fundación, convocóse’l sábadu en Noreña con un tema únicu a tratar: la postura de Conceyu Abiertu de cara a les eleiciones al Parllamentu Européu. Asina, militantes y simpatizantes aldericaron “sobre’l papel que pue xugar Conceyu Abiertu” na cita próxima de los ciudadanos coles urnes, apunta Arbesú. Tres un debate llargu, dos foron les opciones que se consensuaron nel Conceyu Nacional: entamar una campaña crítica “coles instituciones europees que vienen frayando a Asturies”, yá sía pidiendo’l votu nulu o l’astención, o presentase na coalición que se conforme dende Euskal Herria, tovía en construcción. Estes dos alternatives desendolcaríanse siempre “de forma xunitaria dende’l soberanismu d’izquierdes”, nunca en solitariu.

“Agora toca entendenos y dar pasos de forma xunitaria”, continúa Arbesu, que consideraría un “fracasu y una frustración” nun llegar a alcuerdos. Poro, pide “amplitú de mires y xenerosidá” énte les negociaciones próximes p’algamar una candidatura xunitaria, ensin descartar la posiblidá d’entamar de forma conxunta un campaña contra les instituciones europees. En cualquier casu, dende Conceyu Abiertu tamién se pretende sumar a los movimientos sociales asturianos a la iniciativa que se plantegue dende’l nacionalismu d’izquierdes.

Pa la selmana próxima ta previstu un aconceyamientu p’averar postures, continuidá d’otres reuniones previes ente formaciones, al que tán convidaos Izquierda Anticapitalista, Andecha Astur, Compromisu por Asturies y IAS. El resultáu de les conversaciones ente estes organizaciones va llevase a un Conceyu Nacional nuevu pa que la militancia de Conceyu Abiertu tome una decisión definitiva.