“Cada vez hai más factores que nos lleven a facer coses en conxunto”, afirma Yolanda Huergo

La situación económica, social y cultural del país lleva a Compromisu, Conceyu, Andecha y Izquierda Anticapitalista a salir a la cai de forma xunitaria nel Día de la Nación Asturiana. Los convocantes descarten, de momento, dir más allá.

La sede de la Corriente Sindical d’Izquierda (CSI), organización que sofita la marcha xunto con Darréu, el Centru Social Autoxestionáu La Semiente y la Xunta Estudiantil Asturiana, llista a la que tamién se suma’l Sindicatu Unitariu y Autónomu de Trabayadores de la Enseñanza d’Asturies (SUATEA), acoyó una rueda de prensa na que les cuatro formaciones polítiques esplicaron los motivos que-yos lleven a convocar esta manifestación baxo’l lema ‘Asturies decide: pola soberanía y el cambiu social’, con salida a les 12.30 hores de la xixonesa plazuela San Miguel. Yolanda Huergo, vocera nacional de Compromisu por Asturies, señaló que’l lema escoyíu “espeya perfeutamente’l sentir d’esta convocatoria y de les organizaciones que la convocamos, asina como de les que l’apoyen. Asturies, esti 8 de setiembre, tien poco que celebrar y muncho que reivindicar”. Darréu, fixo un llamáu a la ciudadanía “pa que nos acompañe”.

Xesús Nel García Muñiz, representante de Conceyu Abiertu, destacó’l “fechu históricu” que supón la convocatoria y abogó por “una independencia económica de los pueblos” dada la situación social anguaño, “non sólo n’Asturies, sinón tamién en tol Estáu, n’Europa y mediu mundu”. Pela so parte, Arturu Xosé Bermeyu, secretariu xeneral d’Andecha Astur, apuntó que la so formación lleva años celebrando’l 8 de setiembre como Día de la Nación Asturiana “porque antes de qu’esistiera’l Reinu d’España yá esistía’l Reinu d’Asturies; antes de qu’esistiese l’Imperiu Romanu, yá esistía la rexón asturiana… Somos un pueblu milenariu qu’actualmente tamos colonizaos económica y políticamente tanto pol Reinu d’España como pola Comunidá Económica Europea”. Por ello, como respuesta, demandó mirar hacia’l nuesu pasáu y tornar a la industria agroalimentaria “pa depender menos del esterior”.

Enllazando estes pallabres últimes de Bermeyu, Boni Ortiz, d’Izquierda Anticapitalista, comentó que les demandes que lleven a la convocatoria de la manifestación de mañana “tienen mucho que ver cola perda de soberanía” y apuntó que’l 95 por cientu de los alimentos que se consumen n’Asturies proceden de fuera. “Hai malpenes 30 años, los asturianos y asturianes consumíamos lo que producía la nuesa güerta, el nuesu campu y el nuesu mar, tanto direutamente como n’industries tresformadores de tipu alimenticiu. Y eso, de dalguna manera, espresa de manera nidia y evidente la perda de soberanía en momentos onde quién manda nel mundu, quién manda n’Europa, son los grandes poderes económicos que tienen esa política estractiva similar a la de los colonialismos del sieglu XIX”, continuó Ortiz, que se mostró mui críticu coles polítiques neolliberales, recordando la situación de los trabayadores de la factoría de Tenneco en Xixón, prevista pal zarru en marzu.

D’igual forma, señaló que “Izquierda Anticapitalista siéntese a gustu nesta convocatoria y pensamos que ye un pasín pa caminar xuntos. Ésti ye’l camín pa enfrentar los planes del Gobiernu del PP, que son, nin más nin menos, siguir los mandaos de la ‘troika’, del FMI, del Bancu Mundial y de la Comunidá Económica Europea”, y, por último, llamó a la sociedá a frayar el procesu constituyente entamáu cola Transición “y avanzar en procesos constituyentes onde los pueblos espresen la so soberanía y la so capacidá de decidir no económico, no social, no político y na manera de rellacionase unos con otros”.  

“Nun ye’l momentu de falar de candidatures”

La manifestación de mañana ye la primera qu’estes cuatro formaciones convoquen de manera xunitaria nun Día de la Nación Asturiana, un fechu que los representantes de les organizaciones quixeron destacar. Sicasí, descartaron, de momentu, dar pasos hacia una posible candidatura conxunta. “Cada vez hai más factores que nos lleven a facer coses en conxunto”, dada la situación “na que nos atopamos agora mesmo, dende’l puntu de vista económicu, social y cultural”, pero “nun nos paez que sía’l momentu de falar de candidatures. Lo que ye verdaderamente importante ye qu’esos factores faen qu’organizaciones que venimos de dinámiques y trayeutories diferentes coincidamos”, afirmó Huergo. Al respeuto, Bermeyu añadió que “si dientro d’un añu siguimos trabayando xuntos, podemos pensar n’otros plantegamientos. Lo importante del domingu, síamos munchos o síamos pocos, ye que sigamos avanzando”.

Na semeya, Ortiz, Bermeyu, García Muñiz y Huergo.