“Billingüe ye tamién falar español y asturianu”, diz González

La conseyera d’Educación, Cultura y Deporte, Ana González, argumentó que la falta de perres y de profesoráu nun permiten ufiertar una segunda llingua estranxera. Defendió la materia de Llingua Asturiana, anque refugó la oficialidá como solución.

 

La cuestión de l’asignatura en Primaria llegó a la Xunta Xeneral por iniciativa del PP, que lidera l’ataque que ta viviendo l’idioma nel sistema educativu cola intención de facer competir a la Llingua Asturiana y Gallego-asturiano con una segunda llingua estranxera. González afirmó que les persones qu’opten por esta vía y piensen que billingüismu ye dominar el castellanu y l'inglés padecen “catetismu inteleutual”; “tamién lo ye falar español y asturianu”, añadió, esplicando darréu que "un cuartu de la población" del país y “un 53 por cientu” de los escolinos son billingües. D’igual forma, destacó la demanda histórica de la comunidá educativa del enseñu del idioma.

 

PP y UPyD foron les formaciones más crítiques coles pallabres de la conseyera, posición que tamién caltuvo Foro, qu’apuesta por un plurillingüismu ensin dexar de llau la llingua propia. Mentes, IX calificó a González de “poco valiente” por nun avanzar na defensa del idioma y reclamó la oficialidá. Fuera del Parllamentu, un grupu de ciudadanos convocaos pola Xunta pola Defensa de la Llingua Asturiana (XDLA) reclamaron l’enseñu de l’asignatura en tolos niveles educativos.