“‘Moyando’l culu’ va prestar a neños y mayores”, diz Barbero

Ruma Barbero va espublizar esti branu una tira diaria d’humor blanco pela web de nome ‘Moyando’l culu’. El dibuxante entama una cuestación popular pela rede pa asoleyar un llibru con toles histories.

‘Moyando’l culu’ céntrase nes aventures de les vacaciones de branu d’una reciella de neños y neñes d’unos 7 años que reflexa la diversidá esistente anguaño nel país. Asina, Tina Santos Payares, la protagonista que tien como nome los trés puntos de salida d’Asturies y gran esperta de cultura asturiana, arródiase de los sos collacios Vera, fía d’asturianos en Madrid que vien a ver a los güelos y qu’emplega’l castellanu con normalidá colos sos amigos, falantes d’asturianu; Nel, adoptáu y gordín ensin complexos que viste arguyosu la camiseta del Ciares –“ye una forma d’apoyar a los equipos pequeños de Xixón”, apunta Barbero–; Rubén, críu prudente y más introvertíu del grupu que va acompañáu siempre de la so tortuga ‘Vari’ –que de xemes en cuando piensa coses–; y Mari, rapacina que vien de pasar un mal tragu nel hospital pero que ye too vitalidá. Un grupu que va protagonizar decenes d’histories que “va prestar a neños y mayores”, asegura’l xixonés.

“Tenía ganes de facer un proyeutu como ésti, con personaxes fixos na llinia de Mafalda o La Familia Castañón”, apunta Barbero, que tien preparada una web na qu’espublizar mientes xunetu y agostu una tira diaria de ‘Moyando’l culu’. En total, son 62 viñetes que se xuntarán nun llibru de formatu orixinal tres el branu financiáu al traviés d’una cuestación popular pela rede que ta siendo too un ésitu. Ésta principió ayeri y en 24 hores yá algamó más de la metá de les perres necesaries: 815 euros de 1.500 necesarios.

El dibuxante nun escuende la so sorpresa pol bon ritmu del crowdfunding entamada na web Verkami y nun descarta, nel casu de superar los oxetivos iniciales, “ampliar les tires al mes de setiembre”. Les persones que collaboren nesta cuestación popular van recibir recompenses –según la cantidá aportada–, que van denden un exemplar del llibru y l’apaición nos agradecimientos del mesmu (10 euros) a diez exemplares, cuatro tires orixinales dedicaes, trés dibuxos orixinales dedicaos d’ún de los personaxes, l’apaición nos agradecimientos, y un exemplar dedicáu de ‘Aguantando cachones’ y otru de ‘La Chelita (200 euros).