‘Tiempos modernos’, el discu últimu de Dixebra, yá ta disponible nos puntos de venta avezaos

El trabayu númberu doce na carrera de Dixebra, ‘Tiempos modernos’, yá ta disponible pal públicu nos puntos de venta avezaos. El trabayu cuenta con quince pieces que caltienen la filosofía d’esta banda con casi 27 años de vida.

En ‘Tiempos modernos’, los avilesinos muévense ente cantares de calter reggae, ska, punk, metal, folk o rap con una bayurosa instrumentación. Asina, nesti discu van poder sentise’l ‘banjo’, l’acordión, el violín, l’ukelele, la guitarra acústica o percusiones diferentes, amás de los instrumentos habituales na banda. Como bien siendo vezu, les collaboraciones son otru puntu fuerte del trabayu de Dixebra, cola participación de Lisardo Prieto (Felpeyu), Ángel Ruíz, Toño Gómez y Javier Tejedor. L’aspeutu vocal tampoco nun queda atrás gracies al trabayu fechu por Vito Álvarez y dos cantantes llatinoamericanos afincaos n’Asturies: el raperu colombianu Shalóm y la cubana Ariane Valdivié.

Un aspeutu fundamental de los discos de Dixebra son les lletres de los cantares y nesti álbum éstes conviértense nuna “reflexón dende la música sobre los díes convulsos que nos tocó vivir n’Asturies y nel mundu”. Asina nun falten les referencies a Asturies en ‘Nueva economía’, ‘A golpe de tacón’, ‘Caballu al verde’, ‘Motivos pa regresar’ o ‘Química inorgánica’, primer cantar que dedica la banda de manera esplícita a la ciudá que la vio nacer, Avilés. Tamién tratren temes más xenéricos en ‘Cinco cifres’, ‘¿Qué más falta?’, ‘Banqueru’ o ‘A punta de pistola’, y inclusive otros de calter internacional, como ‘Antístasi’, sobre la situación en Grecia anguaño. Hai que destacar que’l discu toma’l nome de la película de Charles Chaplin ‘Modern times’ (1936): “aquellos tiempos modernos que yá avanzare Chaplin nos años trenta del sieglu pasáu son güei la vida de tolos díes de miles de persones nesti capitalismu xabaz. Paru, perda de derechos, represión, corrupción, políticos ensin escrúpulos, alienación..., son claves pa entender l’actualidá y too ello ta presente nes lletres d’esta obra musical, pero tamién la esperanza, la resistencia, la solidaridá o l’activismu tienen espaciu nella”, apunten dende la banda.

P'arredondiar esti trabayu, Dixebra presenta ‘Tiempos modernos’ nun formatu cuidáu, distintu al CD tradicional, con un llibrín con tola información necesaria pa entender dafechu’l sentíu y el por qué de cada canción. Dende esta selmana, tolos interesaos pueden mercar esti discu en grandes almacenes, llibreríes y chigres. Más alantre, los siguidores de la banda van poder sentir los temes de ‘Tiempos modernos’ en direuto en trés conciertos con sede n’Uviéu, Xixón y Madrid.