‘Qué facer’, espaciu selmanal n’asturianu nuevu na RPA

|

Xune Elipe va encargase de conducir un espaciu nuevu n’asturianu na RPA. ‘Qué facer. Informativu d’ociu y tiempu llibre n’Asturies’ va proponer tolos xueves, de 12.30 a 13 hores, planes y actividaes de cara a la fin de selmana.

El programa, incluyíu dientro del magazine ‘El tren de RPA’ (de llunes a vienres de 10.30 a 14 hores), va emitise en direuto a partir de mañana “con unos conteníos rellacionaos colo que s’entiende como ociu en xeneral”. D’esta forma, Elipe va presentar “tola información necesaria pa enllenar el tiempu llibre de cara al fin de selmana”, na que nun van faltar referencies “a fiestes, mercaos, conciertos, representaciones teatrales, xornaes gastronómiques, lliteraries..., y too aquello que faiga más prestosu un vienres, un sábadu o un domingu”, espliquen dende Goxe Producciones. Pa ello va contar col sofitu de collaboradores como Lluis Nel Estrada o Miguel Fernandi ‘Burilo’.

“La intención de ‘Qué facer’ ye ufiertar la información de manera clara y seria, intentando dir más allá de la mera enumberación de datos, afondando nos protagonistes del ociu n’Asturies y creando afición a disfrutar d’esta tierra y del fechu cultural asturianu nel sentíu más ampliu”, añaden dende la productora. Nun primer momentu, l’espaciu d’Elipe va tar nel aire mientres primavera y branu, cola posibilidá de da-y continuidá na seronda. Esti programa súmase asina al informativu n’asturianu de RPA (de llunes a vienres a les 13 hores), presentáu por Naciu Varillas, hasta la fecha únicu espaciu na nuesa llingua na parrilla del ente públicu de comunicación.

 

Contador Estadistiques