‘Nun somos llinguateros’, nome del cantar d’esti añu de Músicos pola Oficialidá

Esti miércoles va presentase’l cantar de Músicos pola Oficialidá que sirve pa promocionar la manifestación del Día de les Lletres y como banda sonora de la reivindicación llingüística. Lleva’l nome de ‘Nun somos llinguateros’.
                                           
Ésti ye’l sétimu añu nel que la Xunta pola Defensa de la Llingua Asturiana trabaya de forma conxunta con esti coleutivu de músicos pa sacar un cantar que sirva pa reclamar los derechos de los falantes d’asturianu. “El single d'esti añu, ‘Nun somos llinguateros’, ye otra prueba más, sólida y apalapable, del compromisu de los músicos col movimientu de reivindicación llingüística n’Asturies”, señalen dende la Xunta pola Defensa de la Llingua Asturiana. La novedá d’esti añu ye que nun se va sacar el cantar en formatu físicu, sinón que va tar colgáu na rede pa que pueda descargase de baldre.
 
El miércoles, a les 12 hores, va presentase en Conceyu Abiertu esti tema que tamién va servir de banda sonora a la manifestación del vienres 6 de mayu convocada por esti coleutivu ciudadanu con motivu del Día de les Lletres. La protesta va principiar a les 19.30 hores de la Estación del Norte d’Uviéu baxo’l lema ‘L’asturianu, llingua oficial’, p’acabar a la puerta del Teatru Campoamor, onde a les 20.30 hores va comenzar l’actu académicu.