‘Más espeso que l’agua’, meyor llibru del 2014 pa la Tertulia Malory

El conxuntu de cuentos ‘Más espeso que l’agua’, de Consuelo Vega, ye’l meyor llibru n’asturianu del 2014 pa la tertulia entreguina.

Según argumentó’l xuráu del gallardón, formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, la obra de Vega trátase de “una magnífica coleición de cuentos qu’algamen con voz sensible, firme y poderosa’l terrén de la maestría narrativa, amosando al llector el delicáu misteriu que s’escuende tres de lo cotidiano, siempre con una prosa esencial, guapa, ensin aditivos. Histories de xente corriente, vides comunes que, gracies a l’habilidá d’una observadora atenta, resulten aventures estraordinaries”.

La escritora de Bustillé sucede asina nel palmarés d’esti gallardón, creáu pola tertulia que se vien xuntando de manera selmanal dende hai 17 años nel pub Tom Malory, a Milio Rodríguez Cueto, que ganara’l premiu l’añu pasáu con ‘Carne de melandru’. Enantes, llevárenlu Xabiero Cayarga, con ‘La neve del cuquiellu’ (2011), y Ruma Barbero, con ‘La Chelita’ (2012).

La intención d’esti premiu ye “prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n'asturianu”. El ganador lleva una ilustración d'Alfonso Zapico y una medalla conmemorativa, que se van entregar nun actu públicu en L'Entregu en feches próximes.