‘La mio voz’, de Marta Mori, va presentase’l 8 de xunu en Xixón

El miércoles 8 de xunu ye la fecha escoyida por Suburbia Ediciones y la Conseyería de Cultura y Turismu pa presentar el llibru ‘La mio voz’ de Marta Mori, Premiu Xuan María Acebal 2010 de poesía. L’Antiguu Institutu va acoyer esti actu a les 20 hores.
 
Xuan Xosé Sánchez Vicente va ser l’encargáu de llevar les riendes d’esta presentación, na que tamién va tar l’autora y Consuelo Vega, direutora xeneral de Política Llingüística. ‘La mio voz’ trátase d’un poemariu intimista que muestra la brillantez de Mori (Xixón, 1965), primera autora en llevase’l Premiu Xuan María Acebal.
 
El xuráu d’esti concursu de renome destacó nel momentu de dar el fallu del premiu que ‘La mio voz’ ye un poemariu intimista y emocionante, mui bien trabayáu n’estilu y forma, y nel que s'afilvanen imaxes que conformen un conxuntu de gran espresividá y riqueza. Suburbia Ediciones yá tien a la venta esta obra a un preciu de 12 euros.