‘Homes invisibles, segundu trabayu discográficu de Bacotexo

Bacotexo, banda de rock del occidente del país, yá tien a la venta el so segundu trabayu discográficu. Trátase de ‘Homes invisibles’, LP con doce cantares en gallego-asturiano que supón la confirmación del grupu.
 
“Despóis del viaxe en A máquina del tempo del sou primeiro disco, Bacotexo volven pra cantar el mundo presente dende a inmaterialidá y a imaxinación como verdadeiros ‘Homes invisibles’, anuncien dende la compañía de la banda formada por Ricardo Saavedra (baxu y coros), Daniel García (batería y voces) y Marcos Nogueiro (guitarra y voces). Nesti trabayu nuevu, Bacotexo esplora “os distintos carricovos del rock pralcanzar el sou propósito con 12 cancióis sin prexuicios nin en lo sonoro nin en lo testual”.
 
Ente les doces pieces que componen esti trabayu, los siguidores del grupu de Tapia van atopar rock agresivu y contundente (‘Paz armada’ y ‘Taliando na Guardia’) o más colorista y vital (‘Campos de meiz’ y ‘Danza del sol’, pasando tamién por composiciones desgarraes (‘Tarde’ y ‘En espiral’) o carnales con sones setenteros (‘Namás os psiquiatras durmen’ y ‘Dafne’). Tamién va haber sitiu nesti álbum pal pop-rock alternativu (‘Cine dacción’ y ‘A muyer invisible’), blues (‘Dous entre millis’) y country-folk acústicu (‘Esperime pra San Blas’). Ente tolos temes destaca ‘En espiral’, inspirada nel rellatu de mesmu nome de la escritora franquía María José Fraga. Con esti cantar, Bacotexo pretende “dachegar al rock a lliteratura contemporania na fala”.