‘Ensayu xeneral’ ye la obra que va representase nel VI Alcuentru Medieval Rei Aurelio

Chechu García y Roberto Corte son los autores de ‘Ensayu Xeneral’, obra que va ser la exa central de la coronación del Rei Aurelio. Esta cita abre les fiestes de L’Entregu y va contar cola participación de Cundi como Rei Aurelio.
 
Nesta ocasión, el rexistru de la obra de teatru ye distintu al d’años anteriores, “al tar escrita en clave de comedia y con dalgunes referencies crítiques sobre temes d’actualidá”, señala Hildegart Blanco, presidenta de la Sociedá Cultural y de Fiestes L’Entregu, coleutivu qu’entama los festexos de La Llaguna. N’años anteriores, otros autores del conceyu encargáronse de la creación de la obra del Alcuentru Medieval Rei Aurelio: ‘Ente querelles y doncelles’, la primera, a cargo del escritor Pablo Rodríguez Medina; ‘Texedora d’orbayu’, tamién de Rodríguez Medina; ‘Les siete novies del rei’, de Xulio Arbesú; ‘El camín que mos marca’ de Xosé Ramón Ardines; y ‘Bruxes, muyeres y reyes’, de Pedro Alberto Marcos.
 
Les fiestes de La Llaguna (del 15 al 18 de xunetu) van abrise cola ‘Coronación del Rei Aurelio’, que nesta ocasión va tar representáu pol ex futbolista Secundino Suárez ‘Cundi’, natural de La Envernal. La coronación va celebrase nel Teatru Municipal nun actu na que la exa central va ser ‘Ensayu xeneral’.