‘El Club Musical’ debuta’l domingu con Blues & Decker

Una de les bandes revelación d’estos años últimos na escena estatal, Blues & Decker, va protagonizar el primer capítulu de ‘El Club Musical’. El domingu va ser, depués de dellos cambios, el día definitivu del programa conducíu por Xune Elipe.

El cantante de Dixebra entrevista a Gus (voz y guitarra), Guzmán (guitarra), Kike (baxu) y Ludwig (batería), componentes d’esta banda afincada en Xixón y premiada col AMAS al meyor discu rock por ‘Stealin’ the blues’, intercalando dellos temes d’una actuación en direuto grabada nel estudiu improvisáu na Sala Club del Centru Niemeyer. Tamién van comentase dos espublizaciones que tienen al blues como protagonista, concretamente los cómics ‘Bluesman’ y ‘El sueño de Meteor Slim’, pa terminar el programa con una axenda de conciertos.

Blues & Decker, grupu que va zarrar mañana les actuaciones del escenariu central de la Semana Negra (22.30 hores), estrena d’esta forma esti programa que busca promocionar la música fecha nel país y, al mesmu tiempu, dar “normalidá y naturalidá en cuantes al aspectu llingüísticu, rellacionando de pasu al nuestru idioma con un tema ‘modernu’ y ‘contemporaneu’ como pue ser la música más actual”, señala Xune Elipe. Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Dr. Explosion, Pauline en la Playa, Patrulla Dixie, La Bandina, Misiva y Felpeyu son les otres bandes que van protagonizar esta primer temporada de ‘El Club Musical’, que finalmente va emitise los domingos a les 23.30 hores na TPA, con redifusión pela RPA los xueves a medianueche.

Na semeya, Ludwig, Kike, Gus y Guzmán.