‘Cuadernos d’Ítaca’, d’Alfonso Zapico, obra ganadora del V Premiu Alfonso Iglesias de cómic en llingua asturiana

El tercer gallardón de los Premios Lliterarios 2013, el V Alfonso Iglesias de cómic, foi pa Alfonso Zapico gracies a la so obra ‘Cuadernos d’Ítaca’. El dibuxante residente en Francia ganara l’añu pasáu’l Premio Estatal de Cómic con ‘Dublinés’.

El xuráu del gallardón, dotáu con 3.000 euros, decidió por mayoría conceder el V Premiu Alfonso Iglesias al cómic ‘Cuadernos d’Ítaca’ pola “profesionalidá que s’amuesa na obra d’acordies coles nueves tendencies europees”. Les persones encargaes de decidir el fallu foron Ana María Fueyo Llaneza, direutora xeneral de Política Llingüística, qu’exerció de presidenta; los autores de cómic Javier Marinas –ganador de la edición anterior del premiu– y Ruma Barbero; l’escritor y guionista Chechu García; y los téunicos en materia llingüística y educativa, Luis Casteleiro y José Luis Remis, de manera respeutiva.

Alfonso Zapico (Blimea, 1981) estudió Artes Plástiques y Diseñu na Escuela d’Arte d’Uviéu, y trabaya como profesional gráficu dende l’añu 2006. Residente anguaño na ciudá occitana d’Engoulaeme, fixo ilustraciones, diseños, animaciones y campañes pa delles axencies de publicidá, editoriales o instituciones, y tien trabayao pa diarios asturianos como ‘Les Noticies’ o ‘La Nueva España’. Na so carrera collaboró en delles obres coleutives y espublizó cuatro títulos de cómic: l’álbum ‘La guerre du professeur Bertenev’ y les noveles gráfiques ‘Café Budapest’, ‘Dublinés’ (Premiu Estatal de Cómico 2012) y ‘La ruta Joyce’. Otros gallardones algamaos pol blimeín son el Prix BD Romanesque Ville de Moulins (2007), l’Haxtur (2008) y el Josep Toutain (2010).

L’Alfonso Iglesias ye’l tercer de los cinco Premios Lliterarios 2013 de la Conseyería d’Educación, Cultura y Deportes que se fallaron hasta la fecha. Marisa López Diz llevó’l VI Premiu María Xosefa Canellada de lliteratura infantil y xuvenil con ‘Tatuaxes nel corazón’, mentes que’l XIX Premiu Xuan María Acebal de poesía foi pa Ricardo Candás por ‘Superficie del silenciu’.