El programa ‘Comando Actualidad’ de TVE pon la so mirada na situación del asturianu

|

El miércoles próximu’l programa de reportaxes ‘Comando Actualidad’, que s’emite pela nueche en La 1 de TVE, va centrase nes llingües minoritaries del Estáu más allá de les oficiales más nomaes. Un equipu d’esti espaciu tuvo esta selmana n’Asturies pa conocer la situación del idioma.

El periodista catalán Ricard Sabaté contó pa ello con dos guíes de lluxu como Xune Elipe y Xosé María García Sánchez ‘Llábana’ nes dos xornaes de grabación que tuvieron llugar n’Asturies d’un programa que tamién va xirar sobre l’estremeñu, l’aragonés, l’aranés y la fala de Xálima. La grabación principió’l llunes de la mano d’Elipe, qu’acudía a la clase d’asturianu que pon la Xunta pola Defensa de la Llingua Asturiana  pa dar una charra sobre música n’asturianu. Ehí, Sabaté pudo falar col profesor Héctor Xil y colos alumnos pa conocer les sos inquietúes, pa depués caleyar per Gascona de camín a Ediciones Trabe y pescanciase del usu del asturianu con normalidá n’establecimientos hosteleros y otros negocios.

Samuel Castro y Esther Prieto sirven nel reportaxe d’introductores de la situación de la lliteratura en llingua asturiana en compañía d’Elipe y Xil, qu’aprovechen el momentu pa mercar ‘La banda sonora del paraísu’, de Xandru Fernández, y ‘Venti negrinos’, de Xosé Nel Riesgo. La siguiente parada ye en Corvera, en Tutu Estudios, pa falar con Sergio Rodríguez y conocer la bayurosa producción musical en llingua asturiana. Pa zarrar la xornada, la cámara de TVE diríxese hacia la Fundación de Música Moderna d’Avilés a grabar un ensayu de Dixebra, banda qu’interpreta ‘La danza’ y ‘Caballu al verde’. Tres el mesmu, Sabaté tien la oportunidá de conversar col guitarrista y maestru Primi Abella, col que pudo tratar la situación del idioma nel sistema educativu, amás de col periodista, lletrista y biógrafu de la banda Paco Álvarez.

Na segunda parte de la grabación, que tuvo llugar el martes, el gaiteru Llorián García toma’l relevu d’Elipe y lleva a Sabaté a Caldones pa falar col so padre, Llábana, ún de los primeros profesores d’asturianu cuando nel 1984 principiaba l’enseñu del idioma na escuela. Darréu, acuden al mercáu de La Pola Siero, onde Llábana conversa n’asturianu coles responsables de los puestos.

Reportaxe de 10 o 12 minutos

Estes dos xornaes van resumise en 10 o 12 minutos, siguiendo’l formatu habitual d’esti programa que mira con seriedá temes d’actualidá al traviés de dellos reporteros y que s’emite pela primer canal de TVE. “La percepción que llevó’l periodista foi mui bona. Sorprendióse pola esistencia d’un verdaderu movimientu de recuperación llingüística n’Asturies”, señala Elipe, que cree qu’esti reportaxe ye importante pa dar a conocer una realidá bien desconocida pal restu del Estáu. El resultáu final va poder vese’l miércoles n’horariu nocherniegu.

Na semeya, Sabaté y Llábana xunto col cámara del programa en Caldones.

Contador Estadistiques