‘Bimenes en danza’ va trayer música y baille tradicional a Martimporra

El polideportivu del Colexu Públicu de Martimporra va acoyer el sábadu 13 d’ochobre l’espectáculu ‘Bimenes en danza’. L’Asociación Folklórica y Cultural Los Yerbatos entama esta iniciativa basada na tradición musical asturiana.

Anabel Santiago va ser la encargada d’abrir les actuaciones, a les 18 hores, xunto a los escolines de canción asturiana de Los Yerbatos. Darréu, va ser el turnu del baille tradicional cola participación de la Banda y Grupu de Baille Los Yerbatos y del Centre de Cultura Tradicional Sarau Alcudienc, formación procedente d’Alcúdia que viaxa dende la islla mallorquina gracies a un alcuerdu de collaboración col coleutivu llocal. Por último, alredor de les 20.30 hores, Xosé Antón Fernández ‘Ambás’ y Ramsés Iglesias van poner el ramu al espectáculu.

‘Bimenes en danza’ conviértese asina “nuna de les cites imprescindibles de la música tradicional asturiana pa esta seronda del 2012”, según destaquen dende’l Conceyu de Bimenes, que collabora na organización del eventu xunto a la Mancomunidá de La Sidra y l’Asociación Cultural El Corriellu La Pandorga.