Ḷḷena y Nava acueyen esti xueves la presentación de dos llibros

Paula Pulgar va presentar en La Pola Ḷḷena’l so volume de cuentos ‘Calidoscopiu’. Mentes, la Mancomunidá de la Sidra va dar a conocer en Paraes (Nava) ‘El llibru de lo más piquiñino de la casa’, una revisión del ‘Llibru del naciatu’.
 
‘Calidoscopiu’, editáu por Trabe, trátase d’una obra compuesta por diecisiete cuentos nes que l’autora de Piñera Baxo amuesa una gran facilidá narrativa. Diecisiete histories onde destaca “la dureza y crueldá de los personaxes, narraes toes elles con una prosa llimpia y direuta”, señalen dende’l Serviciu de Normalización Llingüística del Conceyu Ḷḷena, entidá qu’entama la presentación d’esti llibru dientro del programa ‘Abril con bones lletres’, dedicáu a escritores llocales y que tien como oxetivu l’animación a la llectura. La presentación ta prevista pa les 19.30 hores nel salón d’actos de la Casa de Cultura de La Pola  Ḷḷena.
 
Dende’l Serviciu de Normalización Llingüística d’esti conceyu anucien que van mercar dellos exemplares del llibru de Pulgar pa que toles biblioteques y centros educativos puedan tenelo a la so disposición, amás de pa que l’Ayuntamientu pueda entregalu como regalu institucional. La escritora ḷḷeniza, profesora de Secundaria de Llingua Asturiana y Castellana, foi responsable del Serviciu de Normalización Llingüística de Mieres y tien espublizaos dellos llibros: los infantiles ‘Primeres aventures de Pulgu y Yolín’ (2007) y ‘El mundu de Yolanda’ (2008), y ‘Cuentos de metru y de centímetru’ (2008).
 
Un cuadernu pa pas
 
‘El llibru del naciatu’, editáu nel 2008, tien continuidá con ‘El llibru de lo más piquiñino de la casa’, una revisión del primeru que mantién la intención de “facer presente la llingua asturiana dende los primeros años de vida de los neños y neñes y concienciar a los padres de la importancia del so llabor pa la conservación del nuestru patrimoniu llingüísticu”, señalen dende’l Serviciu de Normalización Llingüística de la Mancomunidá de la Sidra. El cuadernu ilustráu, nel que los pas van poder rexistrar tola evolución del críu dende la so nacencia hasta’l primer añu d’escuela, va repartise na sede de la mesma en Paraes, nel conceyu de Nava, llugar onde va presentase esta iniciativa mañana al meudía, ente los proxenitores qu’empadronen al neñu o la neña en cualquier de los conceyos que conformen la mancomunidá.
 
Xunto col llibru, tamién va entregase una carpeta qu’inclúi un baberu con dibuxos y vocabulariu referente a los primeros años d’infancia, un pallabreru, un mididor d’altor y una pegatina pal coche cola frase ‘Cuidadín, que voi dientro’ pa indicar al restu de conductores qu’hai un críu nel vehículu. Amás d’esta actuación, dende’l Serviciu de Normalización Llingüística de la mancomunidá tienen previsto facer un repartu nuevu de material ente la hostelería y mantener la entrega de lletres de pan pal Día de les Lletres Asturianes, el 4 de mayu. Dos díes enantes, el miércoles 2, va entamar un recital musicáu de poesía nel Teatru Riera. Otra manera, ayeri zarróse’l plazu pa inscribise al taller de llectura que s’organiza en Villaviciosa y Nava pa esta primavera y que pretende averar la lliteratura asturiana a maliayos y navetos.