Ḷḷena entama una campaña pa promocionar los nomes oficiales de los llugares del conceyu

La toponimia oficial en Ḷḷena, como n’otros conceyos del país, ye l’asturiana y dende l’Ayuntamientu quieren que la ciudadanía la utilice. Pa ello pon en marcha una campaña de promoción en collaboración cola Rede de SNL y la Conseyería de Cultura.
 
Ésta tien la denominación de ‘Los nomes de ḷḷugar nun tienen preciu, garra’l tuyu’ y consiste na edición de chapes y pegatines cola toponimia tradicional y oficial de Ḷḷena. En total van repartise 2.000 chapes de Payares, Carabanzo, Campumanes, Casorvía, La Vega’l Ciigu, Tuíza, Xomezana y Ḷḷena, y 300 pegatines pa cristal col nome del conceyu nos servicios del Ayuntamientu y nes fiestes que van celebrase per tol territoriu nos meses próximos, como asocedió nel IX Mercáu Tradicional celebráu esta fin de selmana, coincidiendo con La Flor. D’igual forma, dende’l Serviciu de Normalización Llingüística (SNL) van ponese en contautu coles comisiones de fiestes pa qu’utilicen la toponimia tradicional na cartelería y procedan al repartu del material. Mentes, les pegatines tienen como destín principal los comercios y chigres pa visualizar el nome del conceyu, oficial dende’l 2005 tres l’aprobación del Decretu d’oficialización de la toponimia del conceyu Ḷḷena pol Gobiernu d’Asturies.
 
Esta campaña ta entamada pol SNL de Ḷḷena en collaboración cola Rede de Normalización Llingüística nos Conceyos y la Conseyería de Cultura y Deporte, y va desendolcase tamién n’otros puntos del país, como Llaviana, Mieres, Samartín del Rei Aurelio, Siero y Mancomunidá de la Sidra. De manera complementaria, va editase un videu con xente relevante de cada conceyu que va emitise nos cines y centros escolares del país col oxetivu de promocionar la toponimia asturiana y oficial.