Últimos díes pa presentase al premiu “Elvira Castañón”

El plazu p'apuntase al XV Premiu de Poesía "Elvira Castañón" remata'l próximu 30 de payares. Esti certame que convoca la conceyalía de Cultura cola finalidá de dignificar l'alcordanza de la poetisa ayerana María Elvira Castañón, reparte 2.000 euros en premios, 1.000 pa la modalidá en castellanu y otru tanto pa la d'asturianu.

Les normes del concursu apauten que los poemarios, lo mesmo en castellanu que n'asturianu, han tener ente 250 y 500 versos y presentase por triplicao, a doble espaciu y per una sola cara. Les obras han remitise a la Casa Municipal de Cultura, avenida de la Constitución 31, códigu postal 33.670 de Morea d'Ayer.

Ente los últimos ganadores del premiu tan Manuel Pérez Casaux, premiu en castellanu nel 2003 col poemariu "Hijos de una patria dura" y Carlos Pitcairn Álvarez premiáu n'asturianu con "L´ecu de les flores". Xaviel Vilareyo, Xosé Lluis Campal o Nel Amaro son otros de los autores premiaos nes últimes ediciones d'un concursu que nel 2004 quedó ermu na so variante d'asturianu mientres que na estaya de castellanu trunfó'l poemariu "Donde la memoria duele" de Manuel Luque Tapia.

El Conceyu d'Ayer creó esti premiu pa caltener l'alcordanza de María Elvira Castañón, autora de bien d'obra en llingua asturiana que morrió nel añu 1989 . Ente les sos obres tan ls volúmenes "Llucerín del cielo", "Aller, la mina y el mar" y "Costumes y relatos asturianos". Elvira Castañón foi ponte ente los autores n'asturianu d'enantes de la guerra civil y les primeres xeneraciones del surdimientu nos años 70 del sieglu XX.