Éire va ser el país convidáu na tercer edición del Festival Arcu Atlánticu

El Conceyu de Xixón yá trabaya na tercer edición del Festival Arcu Atlánticu. L'edil Carlos Rubiera anunció esti domingu na clausura del certame, que tornó a ser un ésitu de públicu, qu’Éire va ser el país convidáu pal añu qu’entra.

D’esta forma, esta nación de raigaños celtes garra’l relevu de la ciudá de Naunnt, na Breizh histórica, coneutada con Xixón gracies a la nomada ‘autopista del mar’. Rubiera tamién confirmó les feches de la edición próxima, mui asemeyaes a les d’esti añu: del 25 de xunetu al 3 d’agostu. Una oportunidá nueva de disfrutar d’un festival que, pese a los ataques del PSOE llocal, tornó a ser un ésitu de públicu. L’acertada eleición de situar les carpes n’El Muelle contribuyó a ello de forma especial, convirtiéndose nuna atracción pa los munchos turistes que s’averen nestes feches braniegues a la ciudá.

A lo llargo de diez díes, Xixón acoyó una gran cantidá d’actividaes, dende musicales a deportives pasando poles lliteraries. Nelles l’asturianu tuvo una presencia amplia, anque esti aspeutu podía ameyorase entovía más, sobre manera na cartelería del festival. Hai que destacar la cuidada programación de l’Asociación Cultural L’Arribada, entidá que s’encargó de les Xornaes Lliteraries del Arcu Atlánticu, y la iniciativa de la Oficina Municipal de la Llingua nomada ‘Saca la llingua y la semeya’, una especie de ‘photocall’ nel que mayores y pequeños de dientro y fuera d’Asturies pudieron facer una semeya de recuerdu y conocer un poco más l’idioma del país. Tamién hubo un carpa con llibros y discos n’asturianu, con bonos niveles de venta.

Esta segunda edición del Festival Arcu Atlánticu tuvo otra novedá destacable, como foi la collaboración de cinco conceyos, trés que llenden con Xixón, Carreño, Siero y Villaviciosa, xunto con ún del occidente, Valdés, y otru del oriente, Ribeseya. Pal añu qu’entra ye posible qu’esti abanicu s’abra entovía más cola incorporación de Nava y Cangues d’Onís.