Ástures y romanos tornen a atopase esta fin de selmana en Carabanzo

Esta fin de selmana tien llugar en Carabanzo una de les folixes más orixinales y prestoses del calendariu festivu asturianu. Trátase del Festival Astur Romanu, qu’esti añu va contar cola presencia de Dixebra, La Coḷḷá Propinde y Lurte.
 
Dende güei, y hasta’l llunes, esti pueblu del conciyu de Ḷḷena conviértese nun pobláu ástur que verá cómo les lexones de Roma van tratar de tomalu. Por esti motivu, nun va ser sorprendente ver peles cais del llugar a xente antroxao d’ástures y romanos destinaos a enfrentase’l domingu, a les 14 hores, nuna batalla que recrea los enfrentamientos acontecíos hai más de dos mil años en La Carisa. Asina, nesta primer xornada va celebrase el ‘Advenimientu de les tribus ástures’; mañana, la ‘Víspora del enfrentamientu’; el domingu, ‘La batalla final: ástures contra romanos’; y el llunes, la ‘Firma de la paz romana’.
 
L’Asociación Cultural Jóvenes de Carabanzo tien preparada pa estes cuatros xornaes una cantidá importante d’actividaes qu’ocupen tol día y que tienen los sos puntos fuertes nes nueches de güei y mañana, amás de la batalla de domingu. La música electrónica va protagonizar la ‘Nuiche del Truenu’ gracies a la presencia de David Mallada, que va tar a los platos a partir de les 2.30 hores. Enantes, a les 22 hores, va haber una discoteca móvil y va celebrase la ‘Bacanal ástur-romana’ (2 hores), nel qu’un home y una muyer van baillar en porricu como ufrienda a los dioses.
 
Pal sábadu ta prevista la celebración de la ‘Nuiche Ástur’ que, como ye vezu, nun defrauda. Nesta ocasión, van facer baillar a ástures, romanos y visitantes los aragoneses Lurte, los ḷḷenizos La Coḷḷá Propinde y los avilesinos Dixebra. Pa facilita la presencia de xente, la organización pon a disposición de los interesaos autocares de baldre dende la plaza de la Casa Conciyu de Ḷḷena a les 20 y les 22 hores, pa tornar a les 5.30 hores. L’entamu de los conciertos ta previstu pa la medianueche. Mentes, pa la xornada del domingu, los autocares pa xubir a Carabanzo van salir a les 10 hores, tando la vuelta prevista pa les 20 y 00 hores.
 
I Xornaes Gastronómiques Ástur-romanes
 
Coincidiendo con esta folixa, el restaurante Vía Carisa va celebrar les I Xornaes Gastronómiques Ástur-romanes. Asina, güei, a les 14 hores, entámase la ‘Parrillada de Cernunos’ y, a les 20 hores, la ‘Cena de Belenos’, con platos a escoyer de la carta. Pa mañana, a les 14.30 hores, ye’l turnu de la ‘Comida Ástur’, con un menú compuestu por fabada asturiana, churrascu con pataques y postre, too a un preciu de 17 euros. Yá de nueche, a les 20 hores, ta prevista la ‘Cena de los Dioses’, con platos tamién a escoyer de la carta.
 
Les viandes del domingu, pa les 15 hores, van ser corderu a la estaca, criollos y ensalada y postre, na nomada ‘Saturnalis Romana’ a un preciu de 20 euros. Pa cenar, a les 21.30 hores, va tener llugar el ‘Banquete de Xúpiter’. Por últimu, el llunes, xornada cabera, va haber una xinta popular de 13 a 14.30 hores con sesión vermú, muxones y sardines, a un preciu de 13 hores. Pa pesllar les xornaes, a les 20 hores, va celebrase una espicha a un preciu de 17 euros. Les persones interesaes en disfrutar d’esti eventu han de reservar a lo llargo d’esti vienres nel teléfonu 985.490.357.