Ástura y el coleutivu Softastur entamen en Xixón una charra sobre software llibre y llingua asturiana

|

L’asociación Ástura entama esti martes nel Atenéu Obreru de Xixón una charra sobre software llibre y llingua asturiana. El coleutivu Softastur va ser el protagonista del actu, nel que va presentase la versión última d’Ubuntu.

Los asistentes al eventu van poder conocer de primer mano tolos detalles d’esta versión del sistema operativu pa PC “potente, seguru, llibre de virus y de fácil usu” que ta tornáu al nuesu idioma dafechu gracies al esfuerciu desinteresáu d’esti grupu conformáu por una quincena de persones. Hai que destacar qu’Ubuntu tamién inclúi la suite Ofimática Libreoffice, con procesador de testos, fueya de cálculu y presentación de diapositives.

L’actu convocáu por Ástura, asociación que trabaya “na promoción, el fomentu, la dignificación y la defensa de la llingua y de la cultura asturiana en tolos ámbitos culturales, educativos, empresariales, y sociales; incluyendo instituciones y organizaciones públiques y privaes”, asina como nel “espardimientu y la dignificación de les señes d’identidá d’Asturies”, tamién va servir pa que los representantes de Softastur falen de la importancia del usu d'estes ferramientes pa la llingua asturiana y pa que faigan un repás de los programes disponibles nella, como’l xestor de corréu, los  navegadores web, el correutor ortográficu y delles aplicaciones más. La sede del Atenéu Obreru de Xixón, na cai Cuadonga númberu 7, va acoyer esta charra que tien previsto’l so aniciu pa les 19 hores, con entrada llibre.

 

Contador Estadistiques