Ástura dedica a una xornada al lleonés nel Atenéu Obreru de Xixón

L’asociación pa la promoción y el fomentu de la llingua y la cultura asturiana, Ástura, entama una conferencia sobre la situación del lleonés esti martes en Xixón. Amás, van presentase llibros y discos d’autores lleoneses.

Esta actividá desendólcase gracies a un alcuerdu de collaboración d’Ástura col Atenéu Obreru de Xixón que va llevar a la celebración de delles actividaes nel llocal social de la entidá, asitiáu na cai Cuadonga númberu 7, primeru izquieda. Nesti primer actu va tener llugar la presentación de la obra de teatru ‘Sentir, y nun sentir sentire’, de Fran Allegre, que tamién va dar a conocer nesta xornada’l so discu d’añaes tradicionales de Lleón, ‘Nel briezu’, y el llibru ‘Mitoloxía popular del Reinu de Ḷḷión’, de Nicolás Bartolomé Pérez, que cuenta con ilustraciones d’Alberto Álvarez Peña.

La xornada va completase cola charra ‘La situación del llionés dientro del dominiu llingüísticu ástur’, a cargu del propiu Bartolomé, presidente de l’Asociación Cultural Faceira. Nella va analizar dellos aspeutos del idioma nel país vecín, como la proteición llegal, el contestu sociollingüísticu o la producción cultural, ente otros asuntos. L’actu va principiar a les 19.30 hores y tien entrada llibre.