Ángela Vallina y Jonás Fernández, eurodiputaos asturianos

Asturies pierde un eurodiputáu con respeuto a la llexislatura anterior. Nin Salvador Garriga (PP) nin María Muñiz (PSOE) –el socialista Masip nun entró na llista– resultaron reelixíos, anque debuten Ángela Vallina (IX) y Jonás Fernández (PSOE).

 

Vallina ocupaba’l númberu 6 de la llista de La Izquierda Plural, coalición eleutoral liderada por Izquierda Unida y conformada por Confederación de Los Verdes, Construyendo La Izquierda-Alternativa Socialista, Iniciativa per Catalunya Verds, Esquerra Unida i Alternativa, Els Verds-Opció Verda, Anova-Irmandade Nacionalista, Espazo Ecosocialista Galego, Gira Madrid-Los Verdes, Batzarre y Ezkerreko Ekimena-Etorkizuna Iraztarri, que finalmente sumó 6 escaños. D’esta forma, l’alcaldesa de Castrillón va dexar el so cargu actual pa, según les sos pallabres, defender los intereses d’Asturies n’Europa.

 

L’otru eurodiputáu asturianu va ser l’uviedín Jonás Fernández, númberu 14 de los candidatos del PSOE, en teoría un puestu de salida que tuvo a puntu de nun ser, yá que los socialistes perdieron nestes eleiciones nueve escaños al pasar de 23 a 14. Nacíu nel añu 1979, esti economista foi secretariu xeneral de les Mocedaes Socialistes d’Uviéu ente 1998 y 2000, y asesor de política de la Comisión Executiva Federal del PSOE ente ente 2004 y 2005, compaxinando hasta la fecha la so actividá política col so llabor como analista d’economía y política internacional.

 

Nun pudo repetir en Strossburi y Bruxeles –les dos sedes del Parllamentu Européu– la so compañera Carmen Muñiz, candidata númberu 21, pol fracasu eleutoral del PSOE. Na mesma situación ta Salvador Garriga, 22 de la llista del PP, formación que perdió ochos escaños al pasar de 24 a 16. El tercer eurparrllamentariu d’esta llexislatura, el socialista Antonio Masip, nun entró na llista del PSOE.

 

 

La gran sorpresa de la xornada eleutoral foi l’apoyu popular qu’algamó Podemos, que sumó 5 diputaos cuando les encuentes poníen el so techu en 2. L’avilesina Tania González, númberu 6, quedó polo tanto a les puertes d’algamar escañu, anque la posibilidá de dimisión Carlos Jiménez Villarejo daría la condición d’europarllamentaria a esta moza de 31 años. Nel puestu 3 de la llista, l’ex fiscal anticorrupción yá anunciara que sofitaba la candidatura de Podemos pero que, por motivos personales, nun tenía intención d’ocupar escañu.

 

Hai que destacar los resultaos espectaculares de Podemos n’Asturies, al sumar un 13,67 por cientu de los votos, convirtiéndose na tercer fuercia del país per delantre d’Izquierda Xunida que, sicasí, tamién contó con un apoyu importante del 12,93 por cientu. La candidatura de Podemos tuvo’l sofitu de Compromisu por Asturies, que nun participó nesta cita eleutoral.

 

 

“Percosciente de qu’entá tamos bien lloñe d’articular una alternativa nacionaliega d’izquierda con capacidá pa defender los derechos ya intereses del pueblu asturianu”, Andecha Astur amosó la so satisfaición pol eurodiputáu algamáu pola federación de partíos Los Pueblos Deciden, nel que los nacionalistes compartíen espaciu con EH Bildu, BNG, Alternativa Nacionalista Canaria, Unión del Pueblo y Puyalón de Cuchas. “Ponmos un pocoñín más cerca d’ello, en tantu que mos da voz nuna Europa na que ca vuelta ye más importante tar presente con voz propia”.

 

L’escañu de Los Pueblos Deciden va ocupalu Josu Juaristi, periodista nacíu n’Azkoitia (Gipuzkoa), direutor del ‘Gara’ ente 2004 y 2011 y anguaño del suplementu dominical d’esti diariu vascu, ‘7K’, una persona na qu’Andecha confía pa siguir llevando a Europa temes d’interés pa los asturianos, como l’escándalu d’El Musel o la situación del idioma.