Ángel Medina Álvarez espubliza un estudiu sobre la misa de gaita

El Muséu del Pueblu d’Asturies presentó’l númberu 12 de la ‘Serie Etnográfica’. Trátase de ‘La misa de gaita. Hibridaciones sacroasturianas’, d’Ángel Medina Álvarez, un llibru-CD a partir d’un estudiu promovíu pola Fundación Valdés-Salas.

El caderalgu d’Historia de la Música de la Universidá d’Uviéu profundiza nel so trabayu nuna de “les más desconocíes ayalgues” d’Asturies, la misa de gaita, centrándose nos sos oríxenes y na so sobrevivencia anguaño en dellos puntos del país. Asina, percuerre la historia d’esta lliturxa cantada en llatín acompañada col instrumentu tradicional, na que destaquen dos aspeutos: el so caltenimientu n’Asturies cuando n’otros puntos del norte peninsular yá nun s’oficien mises en llatín, y la manera peculiar col que s’adaptó “al alma del cantu tradicional d’Asturies”. “¿Tonada a lo divino o sacra cantilena rebosante d’identidá asturiana? Esti estudiu esplica que contíen dambes coses, al tiempu que se distingue de caún d’elles”, señalen dende’l Muséu del Pueblu d’Asturies.

El llibru, ilustráu con semeyes feches pol autor a lo llargo del so trabayu d’investigación, inclúi la trescripción de dos mises de gaita feches nos años 1952 y 1980, mentes que’l CD presenta trece cortes grabaos dende los años 50 “que constitúin una amuesa escelente de los testimonios últimos d’esta manifestación de la cultura tradicional asturiana”. En definitiva, un trabayu que contribúi “a la meyor comprensión de la música tradicional asturiana poniendo de relieve una de les sos facetes menos conocíes y divulgaes: el vínculu ente la música llitúrxica y l’instrumentu que simboliza la sensibilidá musical del pueblu asturianu”.