Álvarez Menéndez tuvo presente nel pieslle de la UABRA

|

L’actu de clausura de la UABRA contó cola presencia d’Alfredo Ignacio Álvarez Menéndez. El direutor xeneral de Política Llingüística ratificó’l comprisu de desarrollar la Llei d’Usu, pero refugó falar d’oficialidá.
 
Álvarez Menéndez foi’l representante del Gobiernu nel actu de pieslle de la Universidá Asturiana de Branu (UABRA), onde tamién tuvieron presentes Xosé Antón González Riaño, direutor de la Universidá de Branu; Ana María Cano, presidenta de l’Academia de la Llingua Asturiana (ALLA) y el popular José Luis Fontaniella, alcalde de Cangas del Narcea. Na so intervención, el direutor nuevu de Política Llingüística señaló que “vamos desarrollar la llei que ta en vigor”, como marcaba’l programa eleutoral de Foro Asturias Ciudadano (FAC). Sicasí, refugó facer declaraciones sobre desarrollar el marcu llexislativu más allá de la Llei d’Usu y algamar la oficialidá. D’igual forma, el profesor universitariu destacó la importancia de la UABRA pa consolidar y potenciar la llingua asturiana col oxetivu de que “l’idioma sía aceptáu por tolos asturianos” y amosó la so disponibilidá pa que’l so departamentu tenga bones rellaciones cola ALLA.
 
Pela so parte, González Riaño retrucó a Álvarez Menéndez que “cumplir la llei ye lo mínimo que pue esixise a un políticu” y señaló’l que deséu de l’ALLA ye esa llei sía efeutiva dafechu pa que se convierta “nel pasu previu” pa retomar el debate sobre la oficialidá. El direutor tornó a calificar la UABRA como “un ésitu” y confío na so consolidación en ediciones futures. Mentes, Cano señaló que “cumplir la llei ye de sentíu común”, anque en munches ocasiones nun se faiga y reclamó al Gobiernu a que propicie un un clima de consensu p’abordar, nun futuru próximu, la oficialidá. Por último, l’alcalde de Cangas mostróse mui satisfechu cola presencia, per segundu añu, de la UABRA nel conceyu y destacó la integración total de les actividaes de la Universidá de Branu y los sos asistentes na villa.

Contador Estadistiques