Álvarez González nun faló de la situación del asturianu na so comparecencia en comisión na Xunta

|

Ana Isabel Álvarez González nun faló de la situación del asturianu na so comparecencia en comisión na Xunta, lo que preocupa a la XPDLLA. La conseyera d’Educación sí señaló que pretende regular al personal qu’imparte Llingua Asturiana.
 
La referencia que fixo la conseyera –que tuvo acompañada por Argimiro Rodríguez, viceconseyeru d’Educación y Formación Profesional– na so intervención en rellación al asturianu foi que l'oxetivu del so equipu ye algamar la regulación del personal qu'imparte esta materia. Pa ello, señaló que tán arrexuntandose datos llegales al respective. “Va estudiase la manera pa poder regularizar la situación profesional de too esi colectivu docente”, aseguró.
 
Al respeuto, la Xunta pola Defensa de la Llingua Asturiana (XPDLLA) aseguró nun comunicáu que “pareznos preocupante qu'en tola esposición nun se ficiera nin una sola referencia a la situación de la llingua asturiana nel sistema educativu teniendo en cuenta'l desastrosu empiezu del cursu en Primaria y la llaceriosa situación que presenta la escolarización del idioma en Secundaria”, pa depués resaltar que “namás hubo referencies a estos temes cola interpelación de la diputada Emilia Vázquez, d'IX, y les contestaciones volvieron a ser evasives”.
 
Por esti motivu, el coleutivo de defensa del idioma insta a Álvarez González a “l'aplicación inmediata de los preceptos llegales esistentes que tienen qu'asegurar el derechu al estudiu de la llingua asturiana n'igualdá de condiciones coles demás materies, como venimos esixendo dende hai años. Y eso supón, ente otres coses, la creación de la especialidá de Llingua Asturiana y les garantíes pa que l'asignatura en Secundaria seya voluntaria y non optativa”.
 
Otra manera, en referencia a la intervención d’ayeri d’Emilio Marcos Vallaure, la XPDLLA señaló qu’aprecia una actitú positiva del conseyeru de Cultura y Deporte, anque reclamó “unos niveles de concreción más altos na definición de les llinies de trabayu inmediates”. “La ellaboración de planes de normalización, que puen ser ferramientes bien útiles pal desarrollu d'una política llingüística eficaz, desgraciadamente, como nos muestren esperiencies pasaes, ensin una voluntá clara na toma de midíes acaben por convertise en referencies teóriques ensin llegar a tener aplicación na realidá. Por eso, nun nos queda otro qu'insistir na necesidá de la puesta en marcha inmediata d'una política tresversal de visualización y usu del asturianu en tolos sectores, entes, departamentos y dependencies públiques”, destaca’l comunicáu de la organización cívica.

Contador Estadistiques