Álvarez-Cascos nun acudió a declarar poles sos declaraciones sobre la Policía pol ‘casu Gürtel’

Francisco Álvarez-Cascos nun se presentó nel xulgáu númberu 32 de Madrid pa declarar como imputáu por calumnies al equipu policial qu’investiga’l ‘casu Gürtel’. L’abogáu del llíder de Foro Asturias pidió qu’otru xuez asuma’l casu.
 
“Hai una camarilla de la policía xudicial, instalada en Canillas, dedicada a preconstituir pruebes”, señaló Álvarez-Cascos n’abril del 2010 nuna radio, pa depués añadir que “nel mio casu, de manera clara dedicada a preconstituir una prueba falsa. D'eso doi testimoniu en primer persona. Y como eso hai más. Y pue haber muncho más”. Este declaraciones llevó a l’asociación de xuristes Preeminencia del Derecho a denunciar al ex secretariu xeneral del PP, que tendría que sentase esta mañana nel banquillu del xulgáu númberu 32 de Madrid. Álvarez-Cascos nun asistío, pero sí’ l’abogáu que lu representa –lletráu tamién del Partido Popular–, José Manuel Montero, que presentó una declinatoria alegando la falta de competencia d’esi xulgáu pa investigar los fechos.
 
Montero reclamó qu’l xulgáu d’Instrucción númberu 44 sía’l qu’asuma la causa, yá qu’esti órganu investiga una denuncia que presentó nel 2009 Álvarez Cascos al considerar qu’unes filtraciones que relacionaben a la so persona cola trama 'Gürtel' atentaben contra’l so derechu al honor. En concreto, se refería a una información qu’afirmaba que la Fiscalía Anticorrupción investigaba si la trama de presunta corrupción pagó al ex ministru de Fomento un viaxe a Lanzarote nel 2003.