Álvarez-Cascos convoca eleiciones anticipaes pal 25 de marzu

Francisco Álvarez-Cascos anunció esti llunes la convocatoria d'eleiciones n'Asturies pal 25 de marzu. La prórroga presupuestaria y la situación d'ingobernabilidá na Xunta Xeneral, lleva al líder de FAC a tomar esta decisión.
 
Nuna comparecencia ante los medios de comunicación, el presidente d'Asturies anunció que yá remitió al BOPA el decretu de disolución de la Xunta Xeneral y la convocatoria d’eleiciones nacionales anticipaes el 25 de marzu. Foro Asturias Ciudadano (FAC) algamó’l númberu mayor de diputaos na cita última coles urnes, el pasáu 22 de mayu, anque’l PSOE sumara más votos. Con 16 escaños de los 45 de la Xunta Xeneral, gobierna en minoría, polo que pa sacar alantre les sos propuestes tien que contar cola oposición, conformada pol PSOE (15 diputaos), PP (10) y IX-LV (4).

El presidente asturianu aseguró que’l motivu principal que-y llevó a tomar esta decisión foi “el complot parllamentariu de PP y PSOE" pa refugar el proyeutu de presupuestos pal 2012”, evitando cualquier diálogu que nun consistiera na so retirada pa "imponer mediante prórroga l’insolvente y inservible presupuestu anterior". Na so intervención, ante los miembros del so equipu de Gobiernu y de los diputaos del grupu parllamentariu de FAC, Álvarez-Cascos incidió en que’l presupuestu ye "el llibru de cabecera d’un gobiernu pa la llexislatura". Por ello, defendió que "ensin presupuesto nun hai programa de gobiernu".

D’esta forma, el xefe del Executivu asturianu remarcó qu’en Asturies, como en too sistema parllamentariu, “ye posible gobernar con mayoría parllamentaria relativa, pero ye imprauticable enfrentase a una alianza ente PP y PSOE con mayoría absoluta namái pa impedir gobernar, pa obstaculizar la puesta en marcha del programa de cambiu, pa impedir el diálogu parllamentariu al traviés del debate y aprobación d’enmiendes, y que tien como espresión más evidente la imposición d’un presupuestu prorrogáu que reflexa’l programa del gobiernu anterior". Na mesma llinia, Casco dixo que’l "alcuerdu presupuestariu" ente PP y PSOE "confirma l’enquistamientu desoladores de les fracasaes castes polítiques que pa cada solución, dende un pautu destructor de cualquier esperanza, tienen un problema, y qu’a cada propuesta responden con una oxeción a la defensiva". Asina, pal líder de FAC, nun se trata de valorar si’l Gobiernu pue seguir colos sos propios apoyos, sinón de tomar la decisión que respuenda "a los verdaderos intereses y necesidaes de los ciudadanos".

"Los mios compañeros de gobiernu y yo llegamos democráticamente a los nuesos cargos con voluntá de servir; nun tenemos otra motivación que la de representar en too momentu la voluntá de los asturianos, y nun nos guía otru  propósito que defender los intereses xenerales d’Asturies. Nun llegamos equí buscando cargos de los que servirnos, y nun vamos permanecer nos puestos un minutu más del que respuenda a la convicción de tar faciendo un llabor útil a los nuesos conciudadanos", remarcó na so comparecencia na sede de la Presidencia. Al respeuto, Francisco Álvarez-Cascos definióse como una persona "de fechos y non de castillos nel aire nin de fueos d’artificiu". Por eso, argumentó que nun vino pa volver, a la fuercia, al mesmo sitiu "nin pa ser cómplice pasivu d’una trama pa la qu’Asturies ye’l so ‘cortijo’, con ramificaciones innumerables n’intereses inconfesables, en chiringuitos sectarios y en dalgún medio de comunicación".
 
"Tres sentir los razonamientos de consuelu falsu o los cantos de serena de que con una prórroga presupuestaria se pue gobernar, y que nun ye dalgo inéditu na historia recién del Principáu d’Asturies, faltaría a la verdá y a la decencia y a la dignidá si m’acoyera a esi pretestu pa siguir alantre nesi viaxe ensin rumbu que sepultaría a Asturies nun pozu entá más dramáticu qu’ésti nel que s’instaló’l nuesu presente y la nuesa realidá", señaló.
 
Asturies necesita "un cambiu radical"
 
Álvarez-Cascos defendió qu'Asturies precisa más que nengún otru territoriu estatal "un cambiu radical de la política siguida hasta agora" porque, "amás de sufrir les tases de paru más altu de la nuesa historia, ye la única cola población enllancada na última década; la que tien la tasa de población activa más baxa; y la que presenta mayores defectos de comunicaciones". "A otros va corresponder a partir de güei esplicar les sos decisiones nestos siete meses d'oposición a cualquier cambiu y, ineludiblemente, presentar les sos alternatives al recorte d'ingresos, en nome del qu'impunxeron la vuelta atrás, hacia'l presupuestu del gobiernu anterior", destacó, añadiendo que tamién a otros "va corresponder informar sobre les previsiones macroeconómiques que siguen siendo desconocíes pa los asturianos y pa los españoles, pero en que'l so nome, al paecer, esixíense condiciones singulares a los Presupuestos Xenerales d'Asturies".

"A nós mos correspuende demostrar que nun somos iguales, y que nun vinimos equí a buscar cargos nin a combayar colos de siempre pa llograr el so beneplácitu, en cuenta de dexar too como taba, mientres los asturianos siguen careciendo los errores de polítiques equivocaes, y les inxusticies de la marxinación y de la discriminación ente territorios", argumentó.