Álvarez-Cascos asegura tener “les manes llimpies” nel proyeutu de la incineradora

El candidatu a la presidencia d’Asturies de Foro Asturias Ciudadano (FAC), Francisco Álvarez-Cascos, defendió esti martes en Candás un mayor pesu de los derechos de los ciudadanos na tramitación de proyeutos medioambientales y aseguró tener “les manes llibres y llimpies” no que respeuta la incineradora. Nesta xornada, FAC tamién presentó los sos planes n’educación y formación profesional, ensin nenguna referencia a la llingua asturiana.

Nel actu de Candás, el presidente de FAC refirióse al proyeutu de construcción de la incineradora en terrenos de Coxersa en Serín como “una empresa instrumental, non un organismu públicu, que crearon los socialistes como-yos presta, pa evitar los trámites formales y les obligaciones llegales” y anunció la fin de “les fórmules instrumentales p’abordar proyeutos esenciales que llueu faense ensin proyeutu nin financiación; que se sabe cómo principien, pero non cómo terminen”. Álvarez-Cascos prometió a los vecinos de Carreño, que nestos años últimos tuvieron movilizaos por actuaciones como l’esmonte d’Alto Aboño, qu’en nengún casu la so calidá de vida será “moneda de cambiu” por otros beneficios supuestos que puedan obtener el conxunto de los ciudadanos.
 
Otra manera, FAC anunció esti martes que va apostar por una educación de calidá y una Formación Profesional “qu’avere Asturies a los países más desarrollaos d’Europa”. Esta formación de nueva creación inclúi nel so programa la creación d’un programa de billingüismo n’inglés, la llibertá d’eleición del centru educativu, la lliberación de tol sistema escolar y la conciliación de la vida familiar y llaboral. En nengún momentu fai referencia a la situación que va tener la llingua asturiana.