Álvarez-Cascos afirma que la derecha ta condenada a entendese, pero recuerda que “nun val l’astención”

El presidente d’Asturies en funciones, Francisco Álvarez-Cascos, afirmó que la derecha ta condenada a entendese, pero recordó al PP que “nun val l’astención”. Tamién apuntó que los resultados dan-y el “lideralgu” pal cambiu nel país.
 
Nuna entrevista pela mañana n’Onda Cero, el candidatu de Foro de Ciudadanos mostróse "razonablemente satisfechu" porque'l so partíu tien "la responsabilidá na Xunta Xeneral pa liderar el cambiu n'Asturies. Asina, comparó la so perda de trés escaños cola situación del Real Madrid na lliga de Primera División de fútbol: "perdió cuatro puntos pero sigue sacándo-y seis al Barcelona". Sobre’l PP, señaló que "tamos condenaos a entendemos pa formar mayoríes dende que nun hubo mayoría absoluta nel 2011. La diferencia ye qu'agora nun valen les astenciones". "L'añu pasáu hubo una astención del PP y Foro pudo recibir la investidura, y agora cola astención de Foro o del PP quedaría automáticamente al frente del gobiernu d'Asturies el PSOE. Por tanto, fai falta un compromisu activu. Nun valen les actitúes pasives", matizó Álvarez-Cascos.
 
Mentes, pela tarde, tres una reunión de la Comisión Direutiva del so partíu, destacó que Foro presenta "el balance más positivu de tolos partíos asturianos". "Creo que cumplimos col nuesu deber convocando les eleiciones porque’l PP y el PSOE nun nos dexaron otra alternativa pa evitar el bloquéu políticu y la paralización económica; y puedo dicir que me siento cola conciencia tranquila del deber cumplíu", añadió.
 
“El PSOE ganó les eleiciones a pesar del so balance de cifres históriques de desemplegu n’Asturies, d’espilfarru y de corrupción, y recuperó un poco d’espaciu eleutoral gracies a los resultaos de la operación ‘antiforo’ que montó cola compliciá del PP. Resulta divertidamente contradictorio sentir nes sos valoraciones l’ésitu de la so derrota n’Andalucía, onde podríen gobernar con IX, col escenariu asturianu, onde la victoria y el gobiernu marchen por caminos distintos", reseña Álvarez-Cascos.
 
Na so opinión, el mensaxe que llegó a la sociedá asturiana ye que Foro "nun ye una aventura pasaxera, nin el resultáu d’una improvisación personalista, nin una reaición puntual de rebeldía". "Foro consolida la so carta de naturaleza definitiva al serviciu de los asturianos y failo non como una mezcolanza d’idees compartíes col PP nin con nenguna otra formación, sinón con lluz propia; con idees distintes; con criterios novedosos; con estilu diferenciáu y con un programa de gobiernu fechu de manera minuciosa que nun ye frutu del copiar y del pegar, sinón que ye frutu del saber y del pensar, y que ta calando fondu na sociedá asturiana", añadió.