Álvarez Areces, únicu senador socialista por Asturies

Los trés candidatos al Senáu del PP consiguieron un escañu na Cámara alta, mentes que’l cuartu por Asturies foi pal socialista Vicente Álvarez Areces. Isidro Fernández Rozada tuvo'l mayor sofitu, con 208.654 votos.
 
Los otros dos senadores por Asturies son Laura Sampedro (206.552) y Mario Arias (203.470). Pela so parte, el ex presidente d’Asturies sumó 176.633 votos, 4.152 mil más que la so compañera de partíu María Carmen Sanjurjo (172.481). El primer candidatu de Foro de Ciudadanos, Miguel Ángel Conde, quedóse nos 88.503, mentes que l’académica María Esther García López (IX) sumó 77.476.
 
D’esta forma, Fernández Rozada, Sampedro, Arias y Álvarez Areces van ser los cuatro representantes asturianos nel Senáu nos cuatro años próximos. Na mayor parte d’esti periodu van coincidir na Cámara alta con Isidro Martínez Oblanca (FAC) y Javier Fernández (PSOE), escoyíos pola Xunta Xeneral esti branu.
 
Otra manera, los resultaos de los trés candidatos d’Andecha Astur al Senáu, única formación asturianista que se presentaba a les eleiciones, foi la siguiente: María Dolores Suárez Vallina, 2.082 votos; Mariu Arbesú, 1.438; y Dulce María Gil Fernández, 1.167.