Álex de la Iglesia dimitirá pol so rechazu a la Llei Sinde

El presidente de l'Academia de Cine, Álex de la Iglesia, anunció esti martes que va dimitir del so cargu dempués de la gala d'entrega de premios de los Goya d'esti añu. La causa ye’l so rechazu a la Llei Sinde.

  
"Dempués de la gala, dimito como presidente", calca. Confírmase asina lo qu'ayeri mesmu plantegó'l cineasta en Twitter dempués de que PSOE, PP y CiU algamaren un acuerdu sobre la Llei Sinde.
  
"Tengo que reconocer qu'estos dos años al mandu de la Academia fueron de los meyores de la mio vida. Aprendí muncho, conocí xente estupenda, pero dende un ángulu distintu al del director. Empecé reconociendo que me baxaba películes, sobremanera porno, y sentó fatal a los distribuidores, a los exhibidores y tol oficiu polo xeneral. Hasta me llamó mio madre. Eses declaraciones adolescentes lleváronme a reunime con ellos y entender el so puntu de vista", esplica nesti artículu.
  
Sigue apuntando que lo mesmo-y pasó col problema de "la posición de los creadores na rede". Según diz, empezó faciéndolo "fatal, sin conocer el tema a fondu y dexándose llevar polos sos prexuicios, que son munchos y variaos". Eso llevó-y a decidir reunise con quien quisieren facelo pa esplica-y los sos puntos de vista.
  
"De secute descubrí qu'había munchos puntos en común. Naide taba a favor del tou gratis, taben d'acuerdu en reconocer los derechos (y obligaciones) del autor frente a la so obra, y a toos paecía-yos correctu buscar una manera áxil y eficaz de facelo. Yo, pela mio parte, reconocí que'l modelu de mercáu precisaba ampliase y correxise, que la ufierta llegal nun yera abondo, y que compartir archivos con llibertá yera algo inamovible y deseao por toos", destacó.
  
“Lo coherente ye dexalo. Voi acabar lo qu'empecé, eso sí, nun quiero decepcionar a los compañeros d'oficiu, y prometo nun empañar la ceremonia con esti asuntu", destaca.
  
Tres los Goya
A lo último, calca en que quier que los Goya seyan "la fiesta que toos esperamos" y adelanta que "el debate va siguir, pero nun llugar afayadizu". "Dempués de la gala, dimito como presidente. Voi siguir siendo miembru de l'Academia, debatiendo y metiendo la pata como siempre, pero como director de cine, que ye lo mío", sentencia.