¡Asturies en pie! entama unos alcuentros en Bimenes pa sofitar a les persones represaliaes nes lluches llaborales y sociales

Música, reivindicación y solidaridá ye'l cóctel de los II Alcuentros Alternativos y Populares de Bimenes, qu’entama ¡Asturies en pie!. A lo llargo del sábadu y el domingu van celebrase en Martimporra una bayura d’actividaes col oxetivu de recaudar perres pa sofitar a les persones represaliaes nes lluches llaborales y sociales que vive'l país.

“El 8 de setiembre próximu, el Gobiernu asturianu y los partíos de la Xunta Xeneral  van celebrar una farsa institucional nueva nel ‘Día d’Asturies’. Pero’l panorama nun ta pa celebraciones. Una Xunta Xeneral inútil y un Gobiernu desapaecíu pretenden festexar los sos privilexos y tapecer la miseria na que vive la mayor parte de la clas obrera asturiana”, apunten dende ¡Asturies en pie!, plataforma conformada pola CSI, CGT, CNT-Xixón, SUATEA, FUSOA, Centru Social Autoxestionáu La Semiente, l’Asociación de Para@s y Precario@s d’Asturies, el Centru Social Sestaferia, l’Asociación Picu Rabicu y el Centru Social La Lume. La situación actual provoca l’entamu de movimientos de llucha en defensa de los derechos llaborales y sociales, y con ello, a una represión mayor. “El simple fechu de protestar puede llevanos direutamente a la cárcel. Nesti sen, dende ¡Asturies en Pie! yá se sufragaron les fiances y les multes de dellos compañeros y compañeres encausaes nel conflictu mineru, la fuelga xeneral del 14-N, la llucha contra'l paru, pol albuertu llibre, etc. Munchos d'estos xuicios van tener llugar, probatiblemente, a la fin de 2014 o l’empiezu de 2015 y, en total, atropen un pidimientu de cárcel de 25 años”, afirmen dende esta plataforma.

Cola fin de sumar solidaridá entámense los II Alcuentros Populares y Alternativos de Bimenes, dos xornaes con epicentru en Martimporra nes que tol “dineru que se recalde va dedicase íntegramente al sofitu a les persones represaliaes por participar nes estremaes lluches llaborales y sociales que tán teniendo llugar n’Asturies”. “La clas obrera asturiana tien de ponese en pie y faer frente a tola farsa institucional”, afalen los organizadores, que tiene preparaes una serie d’actividaes que van principiar mañana a les 11 hores con una marcha al Pozu Funeres, onde va facese un homenaxe a los y les lluchadores antifranquistas nel que van participar Pablo Martínez Corral, maestru y investigador de la Memoria Histórica; Samuel Fernández, secretariu xeneral de la CSI; Rubén Vega, profesor d’Historia de la Universidá d’Uviéu; y Enrique Villarreal ‘El Drogas’, ex vocalista de Barricada, que va interpretar dellos temes nel llugar.

A esa mesma hora va comenzar l’actividá nel Mercáu Yerbatu en Santuyanu, na cai La Pamplina, que va tar abiertu hasta les 15 hores –al igual que’l domingu–. Media hora más tarde va abrise’l chigre nel polideportivu de Martimporra, onde van desendolcase tolos actos, con protagonismu pela tarde pa los deportes y xuegos autóctonos, con El Garrapiellu; la música y el baille tradicional, con Los Yerbatos; y un mercáu de coleutivos sociales. Tamién va celebrase, a partir de les 16.30 hores, el I Tornéu ¡Asturies en pie! de Tiru con Gomeru. El Circu na Lluna va animar a los presentes col so espectáculu a partir de les 19 hores, pa continuar, una hora más tarde, con un actu reivindicativu de los organizadores.

Conciertu de dellos estilos musicales

Pa les 21.30 hores ta previsto’l comienzu d’un conciertu musical nel que van participar grupos de dellos estilos. Asina, los presentes van poder difrutar del rock d’El Drogas y la (Des)Memoria Band, del ska de Skama la Rede, el mecigayu-ska de La Tarrancha y el rap d’Arma X y Fran Rubio, y de Dani Antistailo. Ésta ye la única actividá de pagu de tol fin de selmana, con un preciu de 5 euros anticipada y de 7, nel día. Les entraes tán a la venta nel Chigre Vigil y el Chigre de La Campa S. Juan (Bimenes); na Sidrería Canteli, el Café Trisquel y el Centru Social Sestaferia (Xixón); El Cafetón (Avilés); el Chigre Ochobre y el CSA La Semiente (L’Entregu); El Ñeru (Mieres); el Chigre El Diañu (La Pola Siero); y nos llocales de la CSI de Xixón, Uviéu, Avilés y Mieres. Hai que destacar que la organización va disponer d’un prau p’acampar pa la xente que nun quiera garrar el coche y participar nes actividaes previstes el domingu.

Éstes van principiar a les 11 hores cola apertura del Mercáu Yerbatu y cola celebración, a les 12.30 hores, d’un pasucais. Pa les 15 hores ta prevista una xinta popular, a lo que va siguir un conciertu semiacústicu de Juanillous 2.0 pa les 16 hores.