“Onde pisen poques güelles” estrena editorial de Cristina Muñiz

Esti xueves 16 de febreru va presentase na llibrería Trabe d'Uviéu la obra "onde pisen poques güelles" de Cristina Muñiz. L'escritor Xulio Vixil va ser l'encargáu d'introducir el primer llibru d'esta autora corverana escritora tamién de testos pa monólogos y con muncha afición pol teatru que llega al mundu de la lliteratura con un volume nel que s'axunten 19 cuentos curtios y sobre'l que dende la mesma casa editorial apúntase que "amuesa un gran dominiu de la técnica narrativa y del llinguaxe".

La carta de presentación de la obra afirma que "Onde pisen poques güelles" "abre una nueva vía na narrativa asturiana, dando por bonu'l principiu de que la realidá supera a la ficción" y diz que gasta "un realismu ensuchu, chiscáu de pingarates estremes d'irrealidá" pa trazar "una visión certera de la vida d'anguaño, averándose con valentía a los problemes tanto individuales como colectivos que la sociedá de güei va poniendo nel camín".