“Marchóme la gata” nuevu trabayu pa Xentiquina

El grupu de música infantil que dirixe'l mayestru Nacho Fonseca dende la Escuela Pública de Lieres presenta discu nuevu.

Una docena de cantares n'asturianu igüen esti "Marchóme la gata" nuevu trabayu na carrera de Xentiquina, grupu pioneru dende los años 80 na creación y recuperación de cantares pa rapacinos en llingua asturiana, siempre col oxetivu doble de que'l material que s'asoleya sía per un llau un preséu d'entretenimientu pa neñes y neños y que valga tamién como material didácticu nes clases per otru.

Como n'anteriores ocasiones, el grupu d'artistes son los alumnos de llingua de los últimos cursos de primaria de la escuela pública de Lieres, onde pon clase'l mayestru Nacho Fonseca, responsable de la creación y sobrevivencia d'esti grupu enforma especial. Pa esti trabayu, que s'asoleya baxo'l cuñu d'ediciones Ámbitu y que se grabó nos estudios musifactor de Piedras Blancas (Castrillón) Fonseca fexo diez composiciones propies dafechu, xunto con otros dos temes nos que musicó lletres de Sidoro Villa y d'Urbano Rodriguez. El responsable de Xentiquina diz que nun hai grandes novedaes no tocante a la composición del grupu, nel qu'hai, como otres vegaes, un conxuntu de trece o catorce neños y neñes de la escuela, pero sí adelanta que se fexeron dellos cantares pensando más n'enseñanza infantil y otros más estructuraos pensaos pa escolinos de cursos superiores. Hai tamién novedaes nes instrumentaciones, col usu de guitarra, bouzouki, gaita y flautes acompañando al tradicional encontu musical que dan los teclaos, y tamién hai novedá no que cinca a los ritmos, con dellos temes averaos al rock, el blues y el soníu llatinu, pa lo que Fonseca inspiróse en pieces del guitarrista Santana.