“Los asturianos tán arguyosos de selo siempre qu’ello nun entre en contradicción cola so españolidá”

Humberto González ye un apasionáu asturianista dende los entamos del Surdimientu. Esti mierense nacíu nel añu 1961 tien trabayao pol idioma dende'l tarrén políticu y principalmente dende'l lliterariu, siendo autor de dellos importantes volúmenes de poesía y de relatos como "Anatomíes de la mañana". No político, la so salida del Partíu Asturianista a mediaos de los años noventa llevólu al Partíu Popular, onde dempués de diez años de militancia ta algamando un protagonismu importante, o polo menos polémicu, col so nomamientu apocayá como representante del PP na Fundación Municipal de Cultura de Xixón, siendo una de les persones más allegaes a la presidenta del PP xixonés Pilar Fernández Pardo. Pa conocelu meyor, y pa ser a atalantar tola so ironía y conocer lo polémico de delles de les sos idegues sobre'l movimientu asturianista y la so evolución, Inaciu Galán féxo-y esta entrevista pa "Asina foi… el surdimientu" l'espaciu que dirixe na emisora lluanquina Onda Peñes.