Hamas executa a dos palestinos acusaos de collaborar con Israel

El Gobiernu 'de facto'  en Gaza executó pente medies de un pelotón de fusilamientu a dos palestinos que, según Hamas, collaboraren con Israel mientres la última ofensiva na Faza.

Los cadabres de Muhamad Ismail y Nasr Abu Frayej tresportáronse hasta l'hospital depués de la execución, informa'l diariu israelín 'Yedioth Aharonot', que señala que polo menos otros ocho gazacís tán sentenciaos a muerte polos mesmos cargos.
 
Mientres les últimes selmanes, dellos grupos pro Derechos Humanos pidieron a Hamas que diere marcha atrás a la decisión d'executar a los presuntos collaboradores. El grupu islamista publicó delles encuestes d'opinión nes qu'una aplastante mayoría de palestinos apoya la execución d'aquellos, declaraos culpables de collaborar con Israel.
 
Les execuciones ficiéronse ensin l'autorización del presidente de l'Autoridá Palestina (AP), Mahmud Abbas, contraviniendo les mesmes lleis palestines. La cuestión ente Hamas y el movimientu Al Fatá, d'Abbas, algamó un nivel eleváu y n'ocasiones tradúxose n'incidentes violentos dende que Hamás se ficiere col control de Gaza nel branu del 2007. En xineru del 2009, mientres la ofensiva israelina, Hamás executó a seis palestinos, baxo los barruntos de collaborar con Israel.
 
Mientres, y ente'l puntu muertu nes conversaciones ente Hamas y A'l Fatá, dos de los líderes d'estos grupos rivales reuniéronse'l pasáu llunes en Gaza. Al dirixise a los periodistes depués de dicha xunta, los líderes indicaron que les xuntes centráronse na necesidá de detener los ataques mutuos nos medios de comunicación ente los dos grupos, ente otros temes.