Cumpliendo la llei reduciríense un 66% les basures del vertederu

El Consorciu Cívicu plantega una alternativa de reciclaxe y compostaxe que reduciría nun 66% el depósitu de fracción resto nel vertideru de Coxersa nel añu 2015.

La opción básase en cumplir l'amenorgamientu añal del 10% fixada por llei de la parte de les basures que se depositen nel vertederu. Asina lo señaló Dacio Alonso, presidente de la UCE, mientres de la presentación de l'alternativa, acompañáu por Julio Barea, de Greenpeace, y Jesús Alonso, de Comisiones Obreres, sindicatu que sofita esta iniciativa.
 
El Consorciu busca una alternativa a la incineradora de Serín, lideráu pola UCE, y compuestu amás pola Asociación pa la Defensa de la Sanidá Pública, Ecoloxistes n'Acción y la Confederación d'Asociaciones de Vecinos d'Asturies, 
  
"Aplicando l'amenorgamientu d'un 10% que fixa la llei", señaló Alonso, que matizó que ye un mandatu "d'obligáu cumplimientu", el total de recicláu y compostáu pasaría de les actuales 51.001 tonelaes, a les 307.151 en 2015. La fracción restu a vertederu, que güei xustificaría la instalación de la incineradora, al completase la capacidá de les instalaciones de Coxersa, pasaría en cinco años de 466.362 tonelaes actuales a les 158.476, esto ye, un amenorgamientu de 66%. "Namás con cumplir la llei, la incineradora yá nun sería necesaria", señaló Alonso.
  
A partir d'esti añu, y según los datos de l'alternativa del Consorciu, la fracción restu siguiría baxando hasta les 102.598 tonelaes nel 2020, ente que la quema de borrafes na incineradora produciría tolos años 130.000 tonelaes escorias y povises "bien tóxiques", qu'habría que depositar nel vertederu. "Nun ye lo mesmo un vertederu de materiales inertes qu'ún de povises y escories", estremó Alonso.
  
El presidente de la UCE criticó precisamente que dicha llei nun se cumple. Asina, recordó que los mandatos de la Unión Europea fixen unos niveles de reciclaxe, amenorgamientu y compostaxe que nel 2008 yera d'un mínimu del 25% y un máximu del 45%, y nel 2008 d'un mínimu del 55% y un máximu del 80%. "Ye una obligación llegal, non un conseyu voluntarista, y nestos momentos tamos perbaxo de lo fixao nel 2001", comentar el presidente de UCE.
  
Al so xuiciu, estos incumplimientos tienen llugar "de forma interesada y intencional". Asina, recordó qu'en materia orgánico, esto ye no que se refier a oxetivos de compostaxe ye de cero, "nun se fixo nada", datu que tendría qu'avergoñar" a los Conceyos y al Principáu. Recordó así que la materia orgánico supón el 38% de l'actual basura.  
  
Per otra parte, Alonso recordó que la incineradora que pretende instalase quemaría un total de 450.000 tonelaes añales, cuando esti añu prodúcense 517.000. "Quieren quemar el 90% de los residuos", señaló, motivu pol qu'esixó una esplicación. "¿Cómo van facer compatible reciclar con quemar, si quieren quemar prácticamente tolo que se produz?", preguntóse'l presidente de la Unión de Consumidores.
 
Riesgu de cáncer
  
El representante de Greenpeace calcó nos problemes "sanitarios" que produciría la emisión de dioxines y furanos de la incineradora. "Son los elementos químicos y sintéticos más tóxicos que se conocen", comentó, matizando que "les dioxines provoquen cáncer, y n'inferiores niveles alteraciones del sistema inmunitariu y endocrinu". Recordó asina que "nun esiste nivel d'esposición seguro a estes sustancies, polo que l'únicu nivel seguru ye cero".
  
Señaló amás que la incineración "ye la técnica más cara", y que nos conceyos onde funciona gravóse en más d'un 50% la tasa de basures.
  
Tanto'l representante de Greenpeace como'l de CC.OO incidieron en que nun se xenera empléu. Jesús Alonso recordó que "namás se crearíen 80 puestos de trabayu, cuando l'alternativa sostenible xeneraría diez veces más emplegu".
  
Toos recordaron amás que la incineración ye la cuarta de les cinco alternatives establecíes pola UE por esti orde: prevención, reutilización, reciclaxe, incineración y eliminación. "Esto tampoco ye voluntario, ye obligatorio", remachó'l presidente de UCE.