Ḷḷena celebra'l Día del Llibru

La Biblioteca Pública Municipal de La Pola celebra'l 23 d'abril el Día del Llibru con una xornada dedicada al escritor local Vital Aza (1851 –1912). Asina, va programase una ruta lliteraria a la que se dio'l nome de “Ego Sum” n'alusión al títulu d'ún de los poemes autobiográficos del autor ḷḷenizu.
 
L'actividá, pensada pa públicu de toles edaes, va entamar a les siete de la tarde delantre de la casa de natal de Vital Aza, onde se va glosar la figura del escritor y van recitase poemes suyos, pa pasar dempués a los xardinrs del Conceyu, onde s'atopa'l bustu dedicáu al escritor.
 
Dende ellí, pasando pola Plaza Alfonso X El Sabiu, los participantes van dirixise al teatru que lleva'l so nome, onde s'atopa la exposición “Ego Sum”, que recueye publicaciones, manuscritos, fotografíes y otros documentos rellacionaos cola vida y obra del autor. A lo llargo de tola ruta desenvolviérense distintes actividaes nes que los asistentes van poder participar de forma activa.
 
Como puntu final, nel escenariu del teatru Vital Aza a les ocho de la tarde, el grupu de teatru amateur 'Rosario Trabanco' va representar una adaptación de la obra “Les Codornices”, una entretenida comedia d'enriedu, estrenada en 1882 nel Teatru Lara de Madrid.