La Universidá estrena una web con versión n'asturianu y n'inglés

El rector de la Universidá d'Uviéu, Vicente Gotor, presentó güei en rueda de prensa'l nuevu portal web de la institución, una páxina que ta en castellán, inglés y asturianu.

Según indicó Gotor mientres la so interención, trátase d'una páxina "moderna, multilingüe y centrada nos usuarios", que reordena los conteníos pa facilitar a estudiantes, empreses y medios de comunicación, l'accesu a la información.
 
www.uniovi.es, que yá ta disponible, entama los recursos teniendo en cuenta'l perfil del usuariu. La estructura de la páxina apóyase n'ocho perfiles. Cuatro d'ellos van ser pa estudiantes, arrexuntando asina a los que lo son na actualidá, los nuevos, los estranxeros y los que yá cursaron los sos estudios. Los otros cuatro perfiles tán enfocaos al personal docente y investigador, el personal d'alministración y servicios, les empreses y los medios de comunicación.
    
El desarrollu del portal foi coordináu pol Vicerrectoráu d'Informática y Comunicaciones y producíu pel Centru d'Innovación de la Universidá. Según dixo'l rector, trátase d'un proyectu "austeru" -invirtiéronse ente 80.000 y 100.000 euros-, pero necesario, puesto que la web cuenta con una media de 700.000 visites mensuales.
  
Cola presentación d'esta web Gotor cumple ún de los oxetivos de la so campaña electoral, la creación d'una páxina n'inglés y asturianu, que contribuya a "proyectar al mundu la nuesa cultura". L'acabación de la versión nesti últimu idioma yera una vieya demanda de l'Academia de la Llingua Asturiana.
  
Asistieron tamién a la presentación del portal el vicerrector d'Informática, Víctor Guillermo García; y el director del Área d'Innovación Tecnolóxica, Aquilino Juan.

El CUPA contentu cola versión
 
El CUPA celebra la puesta en marcha de la nueva web de la Universidá con una versión n’asturianu, anque cree que’l procesu de normalización tien qu’acelerase.

Pal Conceyu Universitariu pol Asturianu, esta acción supon el cumplimientu d'ún de los puntos más importantes de los alcuerdos ente l'equipu rectoral y el CUPA, que sofitó la candidatura de Gotor nel so día.
 
El Conceyu diz que trabaya col equipu rectoral nestes meyores y entiende qu'ésti, tien de responder a les espectativas abiertes pa la normalización del asturianu. “Pal CUPA ye'l momentu d'acelerar estes polítiques llingüístiques na Universidá, con nueves midíes que sirvan pa normalizar l'asturianu na Institución”, afirmen pa finar.