Academia y Bubok roblen un pautu de collaboración

Mañana nel llar social de l’ALLA va roblase un pautu de collaboración ente Bubok y l’Academia, firmando peles dos partes Don Ángel Herrera, alministrador de Bubok, y Ana Cano.

Ángel Herrera ye un de los mayores espertos en nueves tecnoloxíes del Está español. Nel añu 2000 creó grupobuho.com, primeramente como portal del so grupu de cuentacuentos, pero foi creciendo hasta convertise nel 2004 empezar nuna de les mayores comunidaes lliteraries n’español.
 
Ye sociu de varies empreses relacionaes col ciberespaciu; Evoluziona: la primera que creó, dedicada a conteníos y servicio ocio-culturales, con webs como grupobuho.com, portaldelescritor.com, librosparadescargar.com… Ye la qu'invierte nel restu d'empreses; Medios y Redes: ye un grupu de comunicación por Internet especializáu en microcontenidos; Bubok: un sistema de publicación online con impresión dixital baxo demanda; Iniciador: Xuntu con Lucas Rodriguez y Javier Martín fundó esti alcuentru d'emprendedores. Anguaño'l mayor alcuentru periódicu d'emprendedores nel Estáu. Amás, ye coautor con Jorge Villabona del llibru sobre la historia d'Internet n'España tituláu “15 años d'internet n'España. Anécdotes, esperiencies y otros ENredOS“.
 
Con esti pautu sedrá posible, al traviés de la páxina web Bubok.com, la impresión baxo demanda d’obres escosaes y otres publicaciones d’especial interés pal estudiu filolóxicu. L’Academia súmase asina a otres instituciones como la Biblioteca Nacional, ufiertando esti serviciu a la comunidá científica y a la xente interesao, en xeneral.
 
El pautu ente Academia y Bubok súmase a l’apueste de la institución llingüística poles nueves tecnoloxíes, que tuvo va poco’l so reflexu na migración de los ordenadores de la institución al sistema llibre d’Ubuntu n’asturianu. A lo qu’hai qu’añedir el Centru de Terminoloxía Asturiana, el diccionariu on-line, l’alcuerdu con Google Books o’l cursu sobre nueves tecnoloxíes que l’Academia celebra nos sos Cursos de Branu, qu’esti añu van celebrase en Cangas.