Nueve de cada diez asturianos tomaríen midíes medioambientales

|

El mediu ambiente preocupa al 92,6% de los asturianos, tanto ye asina que nueve de cada diez ciudadanos taríen dispuestos a que se tomen midíes medioambientales.

Los datos vienen del estudiu sobre la situación mediambiental nel 2008 ellaboráu pol Conseyu Económicu Social, CES, que per primer vez, recueye un apartáu referíu a les families y el mediu ambiente.
  
L'informe presentáronlu güei en rueda de prensa'l presidente del CES, Nicolás Álvarez; la coordinadora del informe, Begoña López y el presidente de la Comisión Rexonal de Mediu Ambiente, Jesús Ángel Alonso.
  
Alonso indicó que l'informe contién una información semeyante a la d'años anteriores pero evidentemente colos datos actualizaos, y como novedá inclúi esi capítulu referíu a les families. Asina nel mesmu recuéyese que les families asturianes muestren menor predisposición que la media española a tomar midíes d'aforru d'agua.
  
Casu contrariu pasa coles midíes d'aforru y eficiencia enerxética, mostrándose los asturianos más dispuestos con midíes como les lluces de baxu consumu; l'apagar la calefacción mientres les nueches o la disponibilidá al doble acristalamientu térmicu.
  
L'informe tamién reflexa qu'Asturies ye la comunidá con menor númberu de residencies afectaes polos ruios y los malos golores. Asina'l 11,7 por cientu de les families sufren problemes de ruiu, frente al 25,1% de les residencies españoles y el 8,7 por cientu sufren malos golores frente al 20,3 por cientu.
  
Begoña López foi la encargada de resumir los datos referentes al restu de los capítulos, que reflexen, ente otros aspeutos, qu'Asturies siguió encabezando nel 2008 la llista d'emisiones de gases d'efeutu invernaderu, siendo la tasa per cápita de 30,8 tonelaes equivalentes de CO2 por habitante.
  
Nel 2008 tamién empeoró la salú de los montes asturianos, y fíxolo'l segundu añu consecutivu, según destacó López, qu'ofreció otros datos como l'aumentu del 61% de los accidentes forestales o l'incrementu de detenciones por delitos medioambientales, que pasó tres persones nel 2007 a 7 nel 2008.
  
En cuanto al gastu en proteición ambiental, el mesmu subió un 17,6 por cientu na industria asturiana hasta llegar a los 215 millones. Pela so parte, l'Alministración pública del Principáu dedicó 107,3 millones d'euros al mediu ambiente.
 

Contador Estadistiques