La compraventa de viviendes baxa un 30,8% n'ochobre nel Principáu

El pasáu mes d'ochobre se rexistraron nel Principáu d'Asturies un total de 1.057 compraventes de viviendes urbanes, lo que supón un descensu del 30,8% sobre'l mesmu periodu del 2007 cuando hubo 1.528 compraventes, según datos publicaos güei pol Institutu Nacional d'Estadística (INE), y recoyíos por Europa Press.

La mayoría de les viviendes vendíes en dichu mes yeren viviendes llibres, en concreto, 921, mientres que fueron 136 les ventes de vivienda protexida. En cuanto a les proporciones ente vivienda nueva y usada, fueron asemeyaes con 508 viviendes nueves y 549 usaes.

En total, n'ochobre hubo n'Asturies 5.130 tresmisiones de finques, sumaes a operaciones de compraventa, donaciones, intercambios y otru tipu d'operaciones, tanto de finques rurales como urbanes, incluyíes ente elles les viviendes.

En términos interñales (sobre ochobre del 2007, con 6.191 finques tresmitíes), les tresmisiones de finques cayeron na comunidá un 17,1 por cientu, dao que'l pasáu mes d'ochobre se tresmitieron 5.130.

Analizando sólo'l mercáu de viviendes urbanes se rexistraron en total 1.858 tresmisiones, de les cuales, 371 fueron herencies, 15 intercambios, 21 donaciones, 394 otru tipu de tresmisiones y 1.057 compraventes.

D'esta manera, el Principáu rexistró n'ochobre una tasa de 116 compraventes de viviendes por cada 100.000 habitantes, llixeramente perbaxo de la media nacional, que foi de 118 ventes por 100.000. La tasa asturiana sí queda penriba de la media nel total de finques tresmitíes, al rexistrase na rexón 562 tresmisinoes de finques por 100.000 habitantes, frente a una media de 502.