'Camín de Cantares' estrena la so quinta temporada

TPA estrena güei a les 13:00 una nueva temporada de la serie presentada por Xosé Ambás 'Camín de cantares', qu'estrena una nueva cabecera y anueva'l so grafismu.

Xosé Ambás volverá percorrer el territoriu asturianu p'amosar la tradición oral y la so diversidá llingüística. La canal asturiana emite'l programa tolos sábados, de 13:00 a 13:30, y lo redifunde los xueves de 9:00 a 9:30 y de 15:00 a 15:30.

L'espaciu de TPA va visitar nesta quinta temporada los conceyos de Llangréu, Proaza, Ibias, Cangas, Candamo, Taramundi, A Veiga, Eilao, Llaviana, Samartín,  Ḷḷaciana, Ḷḷena Ayer y Peñamellera Alta, ente otros.

Esta serie documental, inspirada nel Arquivu de la Tradición Oral, quier contribuyir a caltener y tresmitir l'heriedu cultural de los asturianos. L'espaciu mantíen la mesma estructura de les temporaes anteriores con tres partes estremaes: entrevista, recoyida de material y reelaboración contemporanea.

La mayor parte de los protagonistes de la entrevista son muyeres mayores de 70 años que rellaten les sos esperiencies y dibuxen la historia de la muyer del mundu rural asturianu nel sieglu XX. Xosé Ambás percuerre con elles el pueblu y nel interior de la so casa faen un recuento de refranes, cantares y música tradicional de la zona.

La última sección consiste na interpretación contemporanea de la música popular. Tolos capítulos de 'Camín de cantares' ciérrense cola grabación nun estudiu de dalgún de cantar y sones interpretaos pola protagonista. Estes versiones cuerren a cargu del grupu Tuenda y otros músicos destacaos de la escena folk asturiana.