Los ecoloxistes llamenten qu'Asturies vuelve ser "la rexón con peor aire"

La Coordinadora Ecoloxista llamenta qu'un añu más los datos revelen que la calidá del aire sigue ensin cumplir los valores máximos establecíos pola lexislación europea.

Pa los ecoloxistes los datos tán alloñaos de los encamientos de la Organización Mundial de la Salú (OMS) sobre niveles de contaminación almisibles. "Asturies ye con diferencia la rexón d'España que peor aire tien", sostienen los ecoloxistes.
  
Nun comunicáu, la CEA destaca que "cada vez ye más evidente que la contaminación atmosférica afecta na apaición y agravamientu d'enfermedaes respiratories, asina como otres asociaes, como les vasculares y los cánceres". Asina, según los cálculos de la Comisión Europea, esta contaminación provoca añalmente 16.000 muertes n'España, "una gran parte d'elles n'Asturies".
  
Recuerden que la contaminación ye "una competencia del Principáu y de los Conceyos" y un problema "que tendría de ser prioritariu pa cualquier alministración preocupada pola salú de los ciudadanos". D'otra manera, critica que "tolos años se superen los niveles de contaminación, sin que se tomen midíes y mientres se proyecten más instalaciones contaminantes nestos entornos".
  
Amás, indiquen que n'Asturies toles poblaciones tienen medies superiores al valor encamentáu pola OMS de partícules en suspensión y medies "mui elevaes" d'óxidos de nitróxenu, "próximes a la llende de protección pa la salú".
  
"Asistimos a una situación desaxeradamente negativa que nun tien visos d'ameyorar al cortu plazu", alvierte la Coordinadora, que calca na amenaza de más instalaciones contaminantes, ente les que cita "la peligrosísima súper-incineradora de Coxersa" y siete nuevos grupos térmicos de gas en Soto Ribera, Pereda, Nubleo, El Musel, Trubia y Llangréu.