Naz el Colectivo Trafego pa lluchar pola normalización del eonaviegu

El próximu sábadu, 10 d'abril, presentaráse nun actu públicu'l nuevu Colectivo Trafego, una asociación del occidente formada pa lluchar pola normalización del eonviegu.

Los representantes dexaron claro que nun existe neguna polémica cola otra organización que llucha pola defensa del eonaviegu, Xeira, cola que munchos de los sos socios comparten militancia.
  
Nuna nota n'eonaviegu, el colectivu consideró que "anguano el gallego-asturiano atravesa úa situación intolerable". Na so opinión, "a presencia da nosa llingua nel ente público asturiano de comunicación é completamente inesistente", y señaló la "ausencia d'un estatus llegal decente, a oficialidá, que conlleva úa falta visible de normalización social, que s'evidencia especialmente na situación da toponimia, xa que dos 18 conceyos del Eo-Navia sólo cuatro oficializaron os topónimos autóctonos, y einda muitas veces nun se respeta a toponimia tradicional xa oficializada".
  
Denunció públicamente tamién que "el uso del gallego-asturiano por parte das institucióis municipales y autonómicas é testimonial, como lo é a presencia tremendamente deficente nel sistema educativo, xa que son testimoniales as escolas nas que s'imparte Gallego-Asturiano, por nun falar del ausencia total d'esta llingua na Universidá ou na Formación Profesional".
 
Sicasí, el coleutivu señala que non sólo la llingua sufre esti "estao d'agonía nel occidente asturiano", porque "el noso patrimonio material tamén s'esfarrapa pouquín a pouco: molíos, hurros y, mesmo, restos arqueolóxicos sufren as consecuencias de políticas de protección deficentes y d'agresióis incomprensibles, caso del Penedo Aballón (Bual) que foi desestabilizao sin que naide investigue esta agresión, ou das pinturas rupestres da Cova del Demo (tamén en Bual) na qu'apareceron grafitis sin que nada de sepa". "Noutros casos, as agresióis vein directamente das nosas administracióis ou de grandes empresas, como nel caso dos Llagos de Silva (Salave, Tapia), unde a empresa Gold Mines s'emperróu en destrozar os vestixos romanos y el entorno natural pr'abrir úas minas d'ouro (anque finalmente nun foron a ello) con úas respostas das administracióis que sacarían os colores a cualquera", añadió.
  
Comentó tamién el comunicáu la situación de la "mocedá del occidente", y les sos dificultaes "pra botar raigaños na súa propia terra, que fain imprescindible qu'esta mocedá nun se quede parada, espectante ante este panorama". L'actu de presentación del coleutivu tendrá llugar a partir de les 12.00 hores, na Casa da Cultura - Liceo de Navia.